Seinheppinn þjófur eltur uppi á einfaldasta máta á gamlárskvöld

Hann virðist ekki hafa hugsað áform sín til enda, þjófurinn sem braust inn í Samkaup á Selfossi að kvöldi gamlársdags. Svo óheppilega vildi til, fyrir þjófinn, að starfsmaður var við þrif í búðinni og lagði þjófurinn því á flótta.

Nýfallin fönn varð honum þó ekki til mikillar hjálpar þar sem auðvelt reyndist að rekja spor hans til dvalarstaðar hans. Þetta kemur fram í skýrslu lögreglunnar á Suðurlandi.

Maðurinn reyndist hafa fengið sér vel í aðra tánna og bar við minnisleysi þegar hann vaknaði í fangaklefa morguninn eftir. Hann neitaði þó ekki sök.

Þá stöðvaði lögregla akstur bifreiðar í Hveragerði í gærkvöldi. Í bílnum var par sem var sýnilega undir áhrifum fíkniefna. Kannabisefni fundust við leit og í þokkabót reyndist fólkið á stolnum bíl. Skipt hafði verið um skráningarmerki á bílnum. Rannsókn stendur yfir og er parið í fangageymslu.

Aðfaranótt gamlársdags var maður handtekinn á Höfn í Hornafirði vegna gruns um heimilisofbeldi. Þá lagði kona á Selfossi fram kæru á hendur manni vegna líkamsárásar á skemmtistað í bænum. Áverkar reyndust minniháttar.

Helstu verkefni lögreglunnar á Suðurlandi um áramót. Lögreglan á Suðurlandi sendir öllum sínar bestu nýárskveður með ...

Posted by Lögreglan á Suðurlandi on Monday, January 4, 2016