Staðinn að ofsaakstri í Ártúnsbrekku

Ökumaður, grunaður um akstur undir áhrifum áfengis og fíkniefna, var stöðvaður á 110 kílómetra hraða á klukkustund í Ártúnsbrekkunni á fjórða tímanum í nótt. Þetta kemur fram í dagbók lögreglunnar en afdrif ökuleyfis mannsins eru ekki nefnd.

Afskipti voru höfð af öðrum ökumanni sem grunaður er um akstur undir áhrifum áfengis og lyfja en sá var ökuleyfislaus. Ökumaðurinn hafði lent í óhappi á bílastæði við Reykjavíkurveg. Hann var vistaður í fangageymslum vegna rannsóknar málsins.

Á fjórða tímanum var lögregla tvisvar kölluð til vegna slysa á skemmtistöðum. Í öðru þeirra féll maður aftur fyrir sig og hlaut minni háttar skurð á hnakka. Í hinu hafði kona fallið í stiga og misst meðvitund en var að ranka við sér þegar sjúkrabíll mætti á vettvang.

Þá voru höfð afskipti af þremur mönnum vegna vörslu fíkniefna. Málin voru afgreidd á vettvangi.