Borgarstjóri segir niðurstöðu héraðsdóms mikilvæga fyrir borgina

Héraðsdómur Reykjavíkur dæmdi í gær innanríkisráðherra, fyrir hönd íslenska ríkisins, skylt að loka norðaustur-suðvestur flugbraut Reykjavíkurflugvallar innan sextán vikna og endurskoða skipulagsreglur fyrir völlinn til samræmis við lokun flugbrautarinnar. Verði brautinni ekki lokað innan tímarammans sem gefinn er í dóminum leggjast dagsektir á íslenska ríkið, ein milljón króna fyrir hvern dag. Umrædd flugbraut er einnig nefnd neyðarflugbrautin.

Reykjavíkurborg höfðaði málið og féllst dómurinn í meginatriðum á kröfur borgarinnar. Borgin taldi að skjal sem þáverandi innanríkisráðherra, Hanna Birna Kristjánsdóttir, og Jón Gnarr, þáverandi borgarstjóri, undirrituðu árið 2013, fæli í sér bindandi loforð af hálfu Hönnu Birnu um að loka flugbrautinni.

Dómurinn taldi það ekki fara á milli mála að Hanna Birna hafi verið til þess bær að taka slíkar ákvarðanir um breytingar á flugvellinum. Hún hafi verið í þeirri stöðu að geta skuldbundið sig, fyrir hönd ríkisins, til að loka umræddri flugbraut með það fyrir augum að minnka áhrifasvæði flugvallarins.

Að mati dómsins er hvergi í lögum að finna ákvæði þess efnis að ráðherrann þurfi að leita samþykkis Alþingis eða annarra aðila fyrir ákvörðunum af þessum toga.

Héraðsdómur taldi að samkomulagið sem ráðherra og borgarstjóri skrifuðu undir í október 2013 hefði samkvæmt orðalagi sínu falið í sér skýra og fyrirvaralausa skuldbindingu ráðherra um lokun flugbrautarinnar og endurskoðun skipulagsreglna flugvallarins í samræmi við það.

Dómurinn vísaði einnig til þeirrar grunnreglu sem gildir að íslenskum rétti, að gerða samninga skuli halda og sagði ekkert hafa komið fram í málinu sem gæti leitt til þess að víkja bæri frá reglunni.

Íslenska ríkið var einnig dæmt til að greiða Reykjavíkurborg tvær milljónir króna í málskostnað.

Dagur B. Eggertsson borgarstjóri segir þetta mikilvæga niðurstöðu fyrir borgina.

„Dómurinn er ítarlegur og efnismikill, hann tekur á öllum þáttum málsins og talar í raun best fyrir sig sjálfur,“ segir Dagur og bætir við að meginatriðið í málinu sé að samninga beri að halda.

Ekki náðist í Ólöfu Nordal innanríkisráðherra við vinnslu fréttarinnar. Að sögn Þórdísar Kolbrúnar Reykfjörð, aðstoðarmanns ráðherrans, hafði Ólöf ekki getað farið yfir dóminn enn.

„Við vorum að fá dóminn sendan og þurfum að lesa hann yfir og fara yfir forsendur. Í kjölfarið þarf að taka ákvörðun um það hvort honum verði áfrýjað, en það verður gert á næstu dögum,“ segir Þórdís Kolbrún.

Fréttin birtist fyrst í Fréttablaðinu 23. mars.