Eyjólfur ekki sendur utan á morgun

Eyjólfur Kristinn Elvuson, fimm ára drengur sem er í umsjá barnaverndaryfirvalda í Noregi, verður ekki sendur til Noregs á morgun eins og dómur Hæstaréttar kvað á um.

Samningaviðræður standa enn milli íslenskra barnaverndaryfirvalda og norskra um að drengurinn verði vistaður hér á landi.

Bragi Guðbrandsson, forstjóri Barnaverndarstofu, segir að seinagang í málinu megi ekki skrifa á íslensk yfirvöld. Greiða þurfi úr miklum lagalegum flækjum áður en endanleg ákvörðun sé tekin.

„Ég held að á meðan samstarfið er í gangi þá hreyfi menn sig ekki í þessu máli. Þetta hleypur ekkert frá Norðmönnunum og þeir eru ekki hættir við en þessi dagur, 4. desember, hefur enga sérstaka þýðingu í málinu í sjálfu sér,“ segir Bragi.

Fram kom í fréttum í gær að flutningi Eyjólfs hefði verið frestað. Bragi segir það ekki formlega rétt. „Hins vegar má ætla að það eina sem er til í því sé að Norðmenn eru ekki búnir að leggja fram kröfu hjá sýslumanni um að taka barnið fyrir þann fjórða.“

Fréttin birtist fyrst í Fréttablaðinu