Þarf að setja lög um skilarétt

Ólafur Arnarson, formaður Neytendasamtakanna, segir óviðunandi að engin lög séu til um skilarétt hér á landi. Samtökin hafa fengið ábendingar um að útsölur hafi byrjað víða á fyrsta opnunardegi eftir jól og fólk eigi því ekki kost á því að fá fullt verð fyrir vöruna.

„Þetta er vandamál. Þetta þýðir að neytendur eru í raun réttlausir og upp á náð og miskunn verslunarinnar komnir og ég tel það óviðunandi og það verður að setja skýrar reglur og lög um þetta. Ég kalla á það þegar það eru 32 nýir þingmenn á Alþingi. Ég vona að það sé neytendavænn meirihluti,“ segir Ólafur.

Hann segir að á þessum tíma árs leiti neytendur í miklum mæli til Neytendasamtakanna til þess að afla sér upplýsinga um skilarétt. Einnig hafi samtökin verið að fá ábendingar um að að útsölur hafi byrjað víða á fyrsta opnunardegi eftir jól.„Það þýðir að fólk fær ekki einu sinni einn dag til að skipta vörunni á fullu verði,“ segir Ólafur og bætir við að það sé einmitt í þessum málum sem íslensk verslun hafi forskot á netverslun enda sé meira umstang að skila vöru sem keypt er á netinu.  

„Þannig að ég hefði talið að verslunareigendur reyndu að nýta sér það forskot sem þeir hafa en það virðist ekki vera. Það þarf að vera hægt að skila vörum á fullu verði í einhvern tíma, segjum fram í miðjan janúar,“ segir Ólafur.