Kynna app íslenskrar tungu

Smáforritið Orðagull, málörvunarapp fyrir spjaldtölvur, kemur út í dag í tilefni af degi íslenskrar tungu. Forritið er hannað fyrir elstu börn í leikskóla og yngstu börn í grunnskóla.

Viðburðurinn er aðeins einn fárra í tilefni dagsins. Í Hörpu mun forseti Íslands opna vefsíðuna málið.is­ og boðið verður upp á upplestur verðlaunahafa í Stóru upplestrarkeppninni. Dagskrá verður einnig í Safnahúsinu í Vestmannaeyjum, Flensborgarskólanum, á vegum íslenskunema í Háskóla Íslands í Árnagarði og í sendiráði Íslands í Ósló. Frekari upplýsingar má finna á vefsíðu menntamálaráðuneytisins.

Höfundar eru Bjartey Sigurðardóttir, talmeinafræðingur og læsisráðgjafi hjá Menntamálastofnun, og Ásthildur Bj. Snorradóttir, talmeinafræðingur hjá Skólaskrifstofu Hafnarfjarðar. Árið 2010 gáfu þær út bók sem bar sama nafn en smáforritið byggir á sama grunni. „Hugmyndin kviknaði þegar spjaldtölvuvæðingin hófst. Margir leik- og grunnskólar bjóða upp á kennslu á spjaldtölvur en námsefni á íslensku skortir,“ segja Bjartey og Ásthildur. Hún segir að í talmeina- og læsisheimum merki menn augljósan mun á hve orðaforða íslenskra barna er að fara aftur.

„Mörg börn kunna orðin á ensku en ekki íslensku. Það er gott mál ef börn læra annað tungumál en það er graf­alvarlegt ef það bitnar á íslenskunni.“

Útgáfa forritsins er lítið skref í að bregðast við þessari þróun. Smáforritið kemur út í dag og verður fáanlegt ókeypis fyrir tæki með iOS-stýrikerfi. Þegar lagt var í vinnuna var markmiðið að hafa forritið frítt og það tókst með styrkjum frá Rannís, Barnavinafélaginu Sumargjöf og Minningarsjóði Bjarna Snæbjörnssonar og Helgu Jónsdóttur.

Fréttin birtist fyrst í Fréttablaðinu.