Hættulegt ferðalag fyrir fallegar trédúkkur

Íbúar í þorpi einu í Amasonfrumskóginum lögðust allir á eitt við að framleiða nokkur hundruð trédúkkur fyrir veitingastaðinn Sushi Samba í Reykjavík.

„Ég var fengin til þess að aðstoða við hönnun á veitingastaðnum Sushi Samba. Leifur, einn af aðalhönnuðum veitingastaðarins, hafði í huga ákveðna innanstokksmuni sem hann var alveg staðráðinn í að finna til að skreyta staðinn, en hins vegar vissi ég að það gæti orðið mjög erfitt að nálgast þessa tilteknu hluti,“ segir Josy Zareen, spurð hvernig það kom til að sonur hennar, Bruno Beltrao, lagði upp í ferðalag til þorpsins Abaetetuba í Amasonfrumskóginum, til þess að kaupa handgerðar trédúkkur og skrautmuni sem nota átti í þeim tilgangi að fegra veitingastaðinn Sushi Samba í Reykjavík.

„Ég hafði samband við föður minn. Hann bjó á yngri árum í borginni Belem do Para í Brasilíu og kannaðist vel við trédúkkurnar sem ég var að leita eftir, hann sagði mér allt um hönnun þeirra og gaf mér upplýsingar um hvar ég gæti fengið þær,“ segir hún og bætir við að upphaflega hafi trédúkkurnar verið tálgaðar fyrir fátæk börn til að leika sér með.

Josy hafði samband við son sinn, Bruno Beltrao, og fékk hann til þess að ferðast til þorpsins sem er í Amasonfrumskóginum, en ferðalagið þangað er talið hættulegt.

„Ég var alls ekkert viss um að ég væri til í að ferðast þangað einn því þetta er frekar hættulegt ferðalag. Ég fékk vin minn til að koma með mér, þar sem hann þekkti aðstæður betur en ég. Eina leiðin til þess að nálgast handgerðu trémunina er að mæta á staðinn og ræða við heimamenn,“ segir Bruno.

„Abaetetuba er mjög lítið þorp og mikil fátækt er á þessum slóðum. Þegar ég kom þangað í fyrsta skipti fyrir um það bil sex árum var heimamaður sem ég ræddi við fyrst virkilega hissa á þessari heimsókn minni. Mér fannst skemmtilegt að sjá hvernig hann brást við: hann bað alla í þorpinu um aðstoð en ákvað að taka ekki allan gróðann fyrir sig, það leið því ekki að löngu þar til allir í þorpinu lögðust á eitt og gerðu fjögur hundruð dúkkur fyrir mig á mettíma,“ segir Bruno.

Inn í þorpið koma ekki miklir peningar, þar sem ekkert er um söluvarning á staðnum. Var það því mikil hjálp þegar Bruno kom í þeim tilgangi að kaupa trédúkkurnar.

„Þeir notuðu peningana til þess að byggja upp þorpið og nú þegar eru þeir farnir að geta hannað vörurnar af meiri nákvæmni.“

Bruno lagði leið sína aftur til Abaetetuba í febrúar síðastliðnum í þeim tilgangi að kaupa fleiri trédúkkur sem verður komið fyrir á Sushi Samba.

„Þegar ég fór aftur til Abaetetuba snemma á þessu ári, voru heimamenn mun betur í stakk búnir til að taka við pöntun minni. Þeir eru orðnir stoltir af tréhönnun sinni og vita að dúkkurnar eru vinsælar hér á landi. Núna eru þeir búnir að bæta við alls konar smáatriðum og dúkkurnar eru orðnar mjög vandaðar og flottar,“ segir Bruno að lokum.