Um fjörutíu hælisleitendur bíða flutnings úr landi

Um fjörutíu hælisleitendur sem  hafa sótt um hæli hér á landi og fengið endanlega synjun bíða nú eftir flutningi úr landi. Flutningurinn er framkvæmdur af Ríkislögreglustjóra sem hefur reynt að bregðast við fjölgun málanna. Embættið leitar nú fimm hælisleitenda sem ekki hafa gefið sig fram en eiga að vera farnir úr landi.

Hjá Ríkislögreglustjóra hefur verið sett á fót sérstök deild sem mun einungis sjá um þessi mál. Deildin kallast stoðdeild og var sett á fót í september til að bregðast við þeirri miklu fjölgun hælisleitenda sem koma hingað til lands. Í henni starfa sjö manns og sér deildin alfarið um framkvæmd flutninganna.

Um fimm hundruð hælisleitendur eru á Íslandi í dag og samkvæmt skráningum Útlendingastofnunar eru um fjörutíu manns sem hafa fengið endanlega synjun og bíða eftir flutningi úr landi.

„Það er hærri tala hjá okkur líka og það er þessvegna sem það hefur verið lagt meira í þetta hjá Ríkislögreglustjóra. Við erum búin að gera það góðar áætlaðir að við sjáum fram á góðan tíma í að standa okkur í því sem við erum að gera,“ segir Guðbrandur Guðbrandsson, aðstoðaryfirlögregluþjónn. Guðbrandur útskýrir að framkvæmdin sé flókin. 

Verkefni Ríkislögreglustjóra er lokið þegar þar til bær yfirvöld í móttökuríkinu taka við einstaklingunum. Embættið treystir því að yfirvöld þar í landi tryggi þeim þann rétt sem þeir eiga. „Á hinn boginn þegar við erum að fara með fólk til heimalands þá höfum við gefið þeim ferðafé, 50 til 100 evrur, þegar við vitum það að það er peningalaust og þarf að lifa í einhvern tíma eða komst í annan hluta landsins,“ segir Guðbrandur.

Í dag leitar Ríkislögreglustjóri að fimm einstaklingum sem eiga að vera farnir úr landi en hafa ekki gefið sig fram við lögreglu. „Þeir eru í felum eða týndir. Hingað til höfum við látið lýsa yfir þeim innan lögreglunnar,“ segir Guðbrandur.