Á pari við bestu spítala

Mjög góður árangur er af ósæðarlokuskiptum á Íslandi og eru lífshorfur þeirra sem gangast undir aðgerðina sambærilegar við Íslendinga af sama aldri og kyni sem ekki hafa þurft á slíkri aðgerð að halda.

Þetta kemur fram í rannsókn sem er samvinnuverkefni lækna á hjarta- og lungnaskurðdeild Landspítalans, læknadeildar HÍ og Hjartaverndar.

Ósæðarlokuskipti eru önnur algengasta hjartaaðgerðin sem framkvæmd er á Vesturlöndum og eru árlega gerðar um fimmtíu slíkar aðgerðir hér á landi. Aðgerðin er umfangsmikil þar sem hjartað er stöðvað, kalkaða lokan fjarlægð og nýrri loku komið fyrir.

Tómas Guðbjartsson, yfirlæknir á skurðsviði Landspítalans og prófessor, stýrði rannsókninni en grein um hana birtist nýlega í Journal of Heart Valve Disease.

„Niðurstaðan er að snemmkomuárangurinn hér á landi, það er lífshorfur sjúklings innan við þrjátíu daga frá aðgerð, er mjög góður og er á pari við það sem þekkist á bestu spítölum,“ segir Tómas.

Rannsóknin náði til heillar þjóðar og var hægt að fylgja öllum sjúklingunum eftir, sem er sjaldgæft í sambærilegum rannsóknum erlendis. Það gerir rannsóknina sérstæða.

„Við gátum borið saman þá sem fara í þessa aðgerð og aðra á sama aldri og af sama kyni. Rannsóknin leiddi í ljós mjög góðan langtímaárangur. Það kemur skemmtilega á óvart hversu lítill munur er á afdrifum þeirra sem fara í aðgerð og þeim sem ekki hafa þennan alvarlega hjartasjúkdóm.“

Stærstur hluti sjúklinganna er yfir sjötugt. Niðurstöðurnar eru því ekki síst ánægjulegar í ljósi þess að með auknum fjölda aldraðra muni þessum aðgerðum fjölga umtalsvert á næstu áratugum.

„Gagnrýni hefur heyrst bæði utan og innan spítalans á að svo flóknar og dýrar aðgerðir séu gerðar á svo öldruðu fólki. En þessi góði árangur hvetur okkur til dáða og staðfestir að við erum að gera eitthvað rétt.“ 

Niðurstöðurnar

Rannsóknin náði til 366 sjúklinga.

94% sjúklinganna lifðu aðgerðina.

82% sjúklinganna voru á lífi fimm árum frá aðgerð.

Lífshorfur sjúklinga voru sambærilega við þá sem ekki höfðu hjartasjúkdóm.

Fréttin birtist fyrst í Fréttablaðinu 16. júní.