Mourinho með Ferdinand í sigtinu

Samkvæmt enskum fjölmiðlum hefur José Mourinho, nýráðinn knattspyrnustjóri Manchester United, áhuga á að fá Rio Ferdinand inn í þjálfarateymi sitt á Old Trafford.

Rui Faria og Silvino Louro munu fylgja Mourinho til United en þeir hafa unnið með honum í mörg ár. Mourinho vill þó hafa menn sem þekkja innviði Manchester United með sér í þjálfarateyminu og horfir þar til Ferdinand sem lék í 12 ár með liðinu.

Mourinho vill einnig halda Ryan Giggs en óvíst er hvaða hlutverk hjá félaginu honum verður boðið.

Ferdinand, sem er 37 ára, lagði skóna á hilluna í fyrra eftir stutt stopp hjá QPR. Síðan þá hefur hann unnið í sjónvarpi ásamt því að taka þjálfaragráður.