Ekki gerð athugasemd ef CFC eyðublöðum er ekki skilað inn

Skúli Eggert Þórðarson ríkisskattstjóri segir að ef hlutaðeigandi skattaðili leiðir skattstofna réttilega út á skattframtali sínu eða fylgiblaði án þess að fylla út CFC eyðublöð sé ekki gerð sérstök athugasemd við þann framtalsmáta verði skattstofnar réttilega ákvarðaðir. Ef vafi sé á slíku sé skorað á aðilann að bæta úr og skila CFC eyðublöðum ásamt fylgigögnum.

„Eyðublöðin um CFC eru fyrst og fremst verkfæri til að leiða fram skattstofna en breyta í sjálfu sér engu um yfirferð skattframtala eða skattskyldu, hvort eyðublöðin séu fyllt út eða skattstofnar leiddir fram með öðrum hætti,“ segir Skúli Eggert. Hins vegar sé stefnt að því að gera útfyllingu CFC eyðublaða ófrávíkjanlega.

Líkt og greint var frá í dag opnaði Sigmundur Davíð Gunnlaugsson, fyrrverandi forsætisráðherra, bókhald sitt og eiginkonu sinnar, Önnu Sigurlaugar Pálsdóttur, vegna aflandsfélagsins Wintris Inc.

Sigmundur greindi frá því á heimasíðu sinni að ekki hafi verið skilað inn svokölluðu CFC framtali vegna félagsins, enda hafi verið um að ræða verðbréfaeign í vörslu og fjárstýringu banka og tekjur af verðbréfum. CFC félag er erlent félag, sjóður eða stofnun sem staðsett eru á lágskattasvæðum en reglur um slík félög voru settar árið 2010.

Greint var frá því í hádegisfréttum Bylgjunnar í dag að skattalagasérfræðingar hefðu sett spurningarmerki við orð Sigmundar um að honum hafi ekki verið skylt að skila inn CFC framtali. Það eigi ávallt að gera, annað sé ekki í samræmi við íslensk skattalög.

Sigmundur sagði jafnframt að við framtalsgerð hafi verið horft í gegnum Wintris, eins og það hafi aldrei verið til og eignir þess skráðar sem bein eign Önnu Sigurlaugar frá því ári áður en CFC reglurnar tóku gildi.

Skúli Eggert segist ekki geta tjáð sig um málefni einstakra aðila. Þó sé sú aðferð að horfa í gegnum aflandsfélag og færa eignir og tekjur beint inn á framtöl í sjálfu sér í samræmi við meginsjónarmið laga um tekjuskatt. „Við vissar aðstæður getur skattlagningin orðið lægri en þegar horft er í gegnum félag og fært beint inn á framtal,“ segir Skúli. Sigmundur fullyrti hins vegar á heimasíðu sinni að þessi leið sem hann hafi farið hafi skilað sér í hærri skattgreiðslum til ríkisins.

Þá segir Skúli að unnið sé að því að gera CFC eyðublöð rafræn og ófrávíkjanleg.

„Skattframtöl þar sem reynir á eignarhald lögaðila erlendis  eru þannig að vélræn yfirferð er ekki framkvæmanleg. Ríkisskattstjóri hefur nú í undirbúningi að véltaka CFC eyðublöð þar sem tilteknir reitir verða númeraðir. Þegar því verki verður lokið mun útfylling eyðublaðanna verða ófrávíkjanleg.“