Logaði í blaðabunkum í Hlíðunum

Lögreglan þurfti tvisvar í nótt að bregðast við ábendingum þess efnis að búið væri að kveikja í blaðabunkum í Hlíðunum.

Tilkynningarnar bárust lögreglu með um hálfrar klukkustundar millibili um sexleytið í nótt. Að sögn lögreglunnar var einungis um litlar glæður að ræða í fyrra skipti en ákveðið var að kalla eftir liðsauka slökkviliðsins til að ráða niðurlögum eldsins í því síðara.

„Ekki þarf að minnast á það hættu sem skapast getur vegna þess að kveikja opinn eld á almannafæri, sérstaklega í grennd við húsnæði,“ segir í dagbók lögreglunnar.

Þá fékk lögreglan tilkynningu um framkvæmdahávaða frá nýbyggingarsvæði í hverfi 203 Kópavogi laust fyrir klukkan 8 í morgun. „Það er rétt að árétta að samkvæmt reglugerð um hávaða þá eru hávaðasamar framkvæmdir í grennd við íbúðasvæði ekki heimilar fyrir kl. 10:00 um helgar og sérstaklega hávaðasamar framkvæmdir með öllu óheimilar um helgar,“ segir lögreglan í skeyti sínu.