Báðu sérstaklega um umhverfismat

HS Orka óskaði sérstaklega eftir því við Skipulagsstofnun að Brúarvirkjun í Tungufljóti færi í fullt ferli mats á umhverfisáhrifum. Virkjunin er undir 10 megavöttum (MW) að stærð og fellur því ekki sjálfkrafa undir viðmið laga um umhverfismatsskyldu.

Ásbjörn Blöndal, framkvæmdastjóri þróunarsviðs hjá HS Orku, segir í skriflegu svari að rökin fyrir því að fyrirtækið fór fram á að verkefnið færi í fullt umhverfismat væru þríþætt. Virkjunarkosturinn sé rétt undir þeim mörkum sem krefjast þess að framkvæmdin sé metin – eða 9,9 MW. Að á áhrifasvæðinu færu fram eins ítarlegar rannsóknir á umhverfisþáttum og gert er við fullt mat, enda rannsóknir á lífríki, náttúru og minjum á svæðinu af skornum skammti eða ekki fyrir hendi. Þá sé það tryggt við fullt mat að framkvæmdaaðili kynni verkefnið opinberlega og allir sem telja sig málið varða geti þannig komið á framfæri athugasemdum og ábendingum.

„Í opnu ferli eins og mat á umhverfisáhrifum er þá væntir HS Orka þess að fá fram umsagnir sem hafa jákvæð áhrif á verkefnið m.t.t. tækni, umhverfis og samfélags. Við teljum Brúarvirkjun umhverfisvænan valkost í virkjunarflóru landsins, mannvirki eru ekki mjög sýnileg, engir veiðihagsmunir eru til staðar, og landslag og umhverfi er ekki með þau sérkenni umfram það sem almennt þekkist víða,“ segir Ásbjörn.

Skipulagsstofnun féllst á erindi fyrirtækisins eins og kemur fram í bréfi frá því í júní í fyrra. En ákvörðun HS Orku vekur athygli þar sem viðmið laga um matskyldu við 10 MW hafa vakið upp spurningar um hvort ástæða sé til að rammaáætlun taki til virkjana sem eru minni. Hefur þetta álitamál verið til sérstakrar skoðunar hjá verkefnisstjórn rammaáætlunar, en engin niðurstaða liggur fyrir að því er Fréttablaðið hefur heimildir um.

Erfitt gæti reynst að tilgreina ein stærðarmörk virkjana sem ættu að falla undir matsskyldu, en í skýrslu Veiðimálastofnunar um smávirkjanir kom fram að jafnvel mjög litlar virkjanir geta haft mikil áhrif á umhverfið – það er með öðrum orðum ekki framleiðslugeta virkjunarinnar sem segir alla söguna um áhrif hennar á umhverfið.

Bent hefur verið á að einhvers staðar verði þessi mörk að liggja – og að 10 MW rími við stærðarmörk í lögunum um mat á umhverfisáhrifum og við Evróputilskipunina sem lögin eru byggð á.



Tólf virkjanir - ein skikkuð í umhverfismat

Skipulagsstofnun hefur ákvarðað um matskyldu 12 virkjana undir 10 MW árin 2013 til 2015.

10 þeirra voru ekki matsskyldar – og eru flestar mjög litlar.

Brúarvirkjun í Tungufljóti fer í umhverfismat að ósk HS Orku.

Svartá í Bárðardal (9,8 MW) skal háð mati á umhverfisáhrifum, en sú framkvæmd er mjög umdeild innan raða heimamanna, umhverfisverndarhópa og fleiri.