Enginn hræðist Man. Utd lengur

Man. Utd er í frjálsu falli þessa dagana og síðustu tveir leikir hafa tapast gegn Sunderland og Midtjylland.

Neyðarleg töp og stjóri liðsins, Louis van Gaal, segir að það séu breyttir tímar því lið óttist ekki Man. Utd lengur.

„Ef maður skoðar síðustu tvo leiki þá er það rétt. Við verðum að láta lið hræðast okkur á ný. Þetta snýst um að vinna tvo leiki í röð,“ sagði Hollendingurinn.

United á leik gegn Shrewsbury í bikarnum í kvöld og svo er það seinni leikurinn gegn Midtjylland í Evrópudeildinni næsta fimmtudag. Svo er stórleikur gegn Arsenal um næstu helgi.