Borgarstjóri hefur áhyggjur en finnst umræðan ekki endurspegla gott starf leikskólanna

Dagur B. Eggertsson borgarstjóri segir umræðuna um fjárhagsstöðu leikskóla-og grunnskóla í Reykjavík ekki nýja af nálinni. Hann kveðst hafa áhyggjur af því sem hann kallar kerfisbundna skekkju við úthlutun fjár í leikskólum borgarinnar en segir gagnrýni grunnskólastjóra ekki sanngjarna. Þá finnst honum umræðan um leikskólana ekki endurspegla það góða starf sem þar fer fram.

„Þegar leikskólar eru annars vegar þá höfum við ákveðnar áhyggjur af því sem við getum kallað kerfisbundnar skekkjur í úthlutun fjár. Þetta eru í sumum tilvikum mjög litlir skólar og það þarf lítið út af að bregða, til dæmis í langtímaveikindum, til þess að reksturinn fari fram úr og ég held að við verðum að finna nýjar leiðir til að takast á við þetta þannig að það hvíli ekki svona þungt á stjórnendum,“ segir Dagur  í samtali við fréttastofu en í morgun hitti hann áhyggjufulla leikskólastjórnendur á fundi í Ráðhúsinu.

Verið að endurreisa skólakerfið eftir hrun

Borgarstjóri segir hins vegar ályktun skólastjóra í grunnskólum borgarinnar sem þeir sendu frá sér í gærkvöldi ekki alveg sanngjarna.

„Það má ekki gleymast í því að við erum að endurreisa skólakerfið eftir hrun og þær þrengingar sem fylgdu í kjölfar þess. Í upphafi þessa kjörtímabils á milli áranna 2014 og 2015 þá vorum við að bæta um tveimur milljörðum í grunnskólana sem fór að mestu í hækkun launa og svo í fjölgun barna.“

Dagur segir að það hafi verið mjög breið samstaða  um það að starfsfólk skólanna yrði fyrst í röðinni þegar það kæmu inn fjármunir sem hægt væri að nýta til þess að byggja upp. Þá segir Dagur að mesti sparnaðurinn hjá Reykjavíkurborg hafi verið hjá miðlægri stjórnsýslu og minnst í skólakerfinu. Þannig sé meirihlutinn í borginni að forgangsraða í þágu skólanna.

Segir sveltistefnu rekna gagnvart sveitarfélögunum

„Hins vegar er það alveg rétt að á Íslandi er í raun rekin ákveðin sveltistefna gagnvart sveitarfélögunum. Þau hafa ekki fengið að fullu bættan kostnaðinn sem leiddi af yfirfærslu á málefnum fatlaðs fólks. Það er í raun verið að færa tekjur þeirra af útsvari frá þeim og nýjar tölur benda til þess að það séu um fimmtán milljarðar. Þá eru þau að berjast fyrir því að fá beinar tekjur af ferðamönnum í gegnum gistináttagjald og það er ekki orðið við þessum sjálfsögðu kröfum.“

Dagur segir að þetta komi að sjálfsögðu niður á fjárhag sveitarfélaganna og því séu Reykjavík, og önnur sveitarfélög, í þeirri stöðu vegna launahækkana undanfarið að það þarf að finna fjármuni fyrir þær hækkanir. Dagur biður því um sanngirni í umræðunni og þolinmæði gagnvart því verkefni.

Það er hins vegar svo að fleiri en kennarar og skólastjórar hafa fengið launahækkanir. Því er eðlilegt að spyrja hvort ekki megi skoða að hækka einfaldlega leikskólagjöld í Reykjavík og tekjutengja þau þá mögulega þannig að þeir tekjuhærri borgi meir en þeir tekjulægri. Þannig myndu meiri fjármunir renna beint til skólanna.

„Við erum bæði að skoða námsgögnin, matarmálin og fæðisgjöldin í því samhengi og það er eðlilegur hluti af fjárhagsáætlunarvinnunni. Við höfum í verið í þessari vinnu og greiningu með leikskólunum um margra mánaða skeið og ég vona að flestir skynji það að við brennum fyrir þessum málaflokki. Við höfum alltaf verið mjög stolt af leikskólum í Reykjavík og það á svo sannarlega ekki að breytast. Við erum líka stolt af því faglega starfi sem er unnið þar og það sem ég er svolítið hugsi yfir er að mér finnst umræðan ekki endurspegla það faglega og flotta starf sem fram fer í þessum skólastofnunum.“