Ráðvilltur maður fannst í snjó við Bústaðaveg

Lögreglan á höfuðborgarsvæðinu þurfti að hafa afskipti af manni á tíunda tímanum í morgun sem fannst liggjandi í snjónum við Bústaðaveg.

Í dagbók lögreglunnar kemur fram að maðurinn hafi verið í annarlegu ástandi þegar lögreglumenn stjökuðu við honum. Hann hafi verið illa áttaður og hafi ekki vitað hvar hann var staddur.

Þá var hann orðinn kaldur eftir að hafa legið einhverja stund í snjónum. Maðurinn var færður á lögreglustöð og vistaður í fangageymslu – „meðan ástand hans lagast,“ eins og það er orðað í dagbókarfærslunni. Ekki er nánar tilgreint hvort maðurinn hafi verið ölvaður eða undir áhrifum annarra vímuefna.

Lögreglumenn sem staddir voru á Breiðholtsbraut þurftu að hafa hendur í hári ökumanns sem ók einkennilega á sjötta tímanum í morgun. Hann sinnti ekki stöðvunarmerkjum lögreglunnar, jók hraðann og ók yfir gatnamót á rauðu. Þegar hann stöðvaði loks bifreiðina hljóp hann af vettvangi.

Lögreglumenn náðu þó að hlaupa hann uppi og höfðu hendur í hári hans skömmu síðar. Ökumaðurinn á að hafa kastað frá sér yfirhöfn og í dagbókarfærslu lögreglunnar segir að ætluð fíkniefni hafi fundist í vasa yfirhafnarinnar.

Maðurinn er sagður hafa verið án ökuréttinda og að hann hafi í raun aldrei öðlast slík réttindi. Bifreið hans var flutt af vettvangi með dráttarbifreið.