Heimsótti bændur sem rækta kakóbaunir sem notaðar eru í íslensk páskaegg

„Ég veit eiginlega ekki hvar ég á að byrja," sagði Kristján Geir Gunnarsson, framkvæmdastjóri markaðs- og sölusviðs hjá Nóa Síríus, um menningarsjokkið sem hann fékk á ferðalagi sínu til Fílabeinsstrandarinnar. Krstján sagði frá ferðalaginu, sem hann fór í fyrir um tvemur árum, í Bítinu á Bylgjunni í morgun.

Í Bítinu ræddi Kristján um aðstæður bænda sem rækta kakóbaunir á Fílabeinsströndinni og Gana. Kristján sagði frá því að á Fílabeinsströndinni væru gríðarlegar öfgar og ójöfnuður. Hluta landsins væri stýrt af skæruliðahreyfingum en síðan væru gríðarlega fallegar byggingar inni í borgunum og styttur af frægum fótboltamönnum.

„Það sem sló mig mest að fólk var bara svo ánægt. Það voru bara allir brosandi. Það var ekkert hungur og fólk hafði það ekkert slæmt."

Kristján sagði frá því hvernig kakóbaunir eru verkaðar. Þær vaxa á trjám inni í skógum. Hann sagði að tvisvar á ári væru þær skornar niður með sveðjum og hnífum. Baunirnar eru svo verkaðar inni í skóginum. Baunirnar eru brotnar inni í skóginum og fræ sem eru inn í þeim eru notaðar til kakóframleiðslu. Þau eru þurrkuð inni í skóginum. Byrgjar sækja síðan baunirnar til bændanna þegar þær eru tilbúnar til vinnslu. Þaðan eru þær ristaðar, brenndar og pressaðar. Úr því verður kakómassi sem fluttur er til Íslands.

Ferðalag Kristjáns til Fílabeinsstrandarinnar var til þess að kynna sér skilyrði bændanna sem vinna kakóbaunirnar sem notaðar eru í framleiðslu á íslensku súkkulaði. Ferðin var liður í alþjóðlegu verkefni sem Nói Siríus tekur þátt í til þess að bæta skilyrði bænda sem framleiða kakóbaunir, í Gana og á Fílabeinsströndinni. „Við lögðum mikið upp úr því að finna prógram sem við gætum treyst." Á endanum valdi fyrirtækið hið svokallaða Quality Partner Program, eða QPP. Fyrirtækið hefur nú fengið vottun frá QPP.

Hér að neðan má hlusta á viðtalið við Kristján í Bítinu.