Yfirkennari Verzló setur 12:00 stólinn fyrir dyrnar

Skólayfirvöld telja hópurinn sem gengur undir nafninu 12:00 innan Verzlunarskóla Íslands koma óorði á skólann. Þetta er hópur sem fengist hefur við gerð skemmtiefnis undir hatti skólans og nemendafélagsins, sem svo hefur verið aðgengilegt á netinu. Hefð hefur verið fyrir þessari starfsemi innan skólans, en starfið í vetur hefur augljóslega farið algerlega úr böndum.

Þorkell Diego, yfirkennari Verzlunarskóla Íslands hefur sent nemendum harðort bréf vegna framgöngu hóps innan skólans sem gengur undir nafninu 12:00 (tólf núll núll).

Hann segir að sér þyki leitt að þurfa að tilkynna að misknotkun nokkurra núverandi og fyrrverandi nemenda á því nafni hafi orðið þess að endurskoða þarf hvort nefnd með þessu nafni geti framvegis starfað innan skólans.

„Verði það niðurstaðan hafa þeir orðið þess valdandi að arfleifð tuga nemenda sem hafa lagt stund á þáttagerð 12:00 undir merkjum NFVÍ og Verzló rofnar,“ segir í harðorðu bréfi yfirkennarans til nemenda.

Lesendum til glöggvunar fylgja fréttinni myndbönd sem 12:00 hafa sent frá sér í vetur og má sjá að mikið er í þau lagt.

Farið með einbeittum vilja gegn reglum skólans og gildum

Þorkell Diego fer yfir það í bréfi sínu að 12:00 hafi í gegnum tíðina notið vinsælda langt út fyrir veggi skólans og höfðað til mjög breiðs aldurshóps.

Fyrir vikið hafi meðlimir 12:00 þurft að bera ríkari ábyrgð á því efni sem frá þeim hefur komið „enda fer það í opinbera birtingu og þá er stutt í dómstól götunnar á samfélagsmiðlum. Auknum vinsældum fylgir ábyrgð og um það hefur ríkt sátt og skilningur milli skólans og nemendafélagsins,“ segir Þorkell.

Og svo enn sé vitnað beint í bréf yfirkennarans:

„Það má ljóst vera að viðkomandi aðilar fara með einbeittum vilja gegn gildum skólans og brjóta m.a. þær reglur sem hér gilda um meðferð áfengis og tóbaks sem fer í dreifingu í nafni skólans. Það er sorglegt þegar nokkrir aðilar taka einhliða ákvörðun að nýta sér með svo freklegum hætti það orðspor sem aðrir hafa byggt upp í kringum 12:00. Við þekkjum ýmis dæmi þess að nemendur sem ekki eru lengur í skólanum (yfirleitt útskrifaðir) haldi þáttagerð áfram en þá er það undantekningarlaust gert undir nýjum formerkjum af virðingu við nemendafélagið og tengsl þess við vörumerkið 12:00 (tólf núll núll).“

Sakaðir um að stela auglýsingatekjum

Vísir hefur heimildir fyrir því að margir nemendur innan skólans séu verulega ósáttir við framgöngu þess hóps sem starfar undir þessum merkjum og hugsar honum þegjandi þörfina.

Í fréttum hefur meðal annars verið greint frá drykkju nemenda og prófsvindls. Þetta er talið varpa skugga á hið góða starf sem fer að öðru leyti fram, á vegum nemenda. Í bréfi sem Vísi hefur borist er vísað til þessa og fullyrt að þetta séu einmitt sömu einstaklingarnir.

„Þetta leiddi til þess að þeir voru reknir úr skólanum,“ segir bréfritari.

Uppfært klukkan 22:00:

Í bréfinu er fullyrt að viðkomandi piltar séu bitrir og þeir hafi ákveðið að virða ekki áminningar. Í bréfinu koma fram ásakanir um að þeir hafi gerst sekir um auglýsingasöfnun í nafni nemendafélagsins án heimildar, en Vísir hefur ekki fengið það staðfest.