Fann tvíburasystur sína á Youtube

„Í desember 2012 var ég í London, að læra fatahönnun, þegar samnemandi minn setti Youtube-myndband af mér á Facebook-síðuna mína. En ég hef aldrei gert Youtube-myndband á ævinni. Þegar ég horfði á það áttaði ég mig á því að þetta væri ekki ég eftir allt saman, heldur var þetta bandarísk stelpa sem leit nákvæmlega út eins og ég.“

Svona hefst frásögn Anaïs Bordier af því þegar hún, fyrir tilstilli myndbandadreifisíðunnar Youtube, fann tvíburasystur sína sem hún hafði aldrei séð og vissi ekki af.

Í pistli á vef the Guardian segir hún frá því hvernig hana hafði alltaf grunað að hún væri ættleidd. Hún sé fædd í Busan í Suður-Kóreu en ólst upp í Frakklandi hjá fólki sem var allsendis ólíkt henni, með ljóst hár og blá augu. Þegar myndbandið kom fram á sjónarsviðið sagði hún að allur vafi hafi verið tekinn af.

„Ég horfði á myndbandið aftur og aftur í leit að einhverjum mun á okkur en við vorum nákvæmlega eins, að frátöldum fötunum og hreimnum,“ sagði Bordier sem átti í miklum erfiðleikum með að hafa upp á systur sinni.

Það var ekki fyrr en mánuði síðar sem hún rak augun í stiklu fyrir nýja kvikmynd að hún komst á sporið. Hún fletti upp leikurum myndarinnar og fann þannig nafn systur sinnar, Samantha Futerman.

„Ég komst að því að hún var fædd í Suður-Kóreu þann 19. nóvember árið 1987, sama dag og ég. Mér brá svo mikið að ég þurfti að fara úr strætisvagninum sem ég var í. Ég hringdi í mömmu og hún sagði það sem ég hafði óttast: „Heldurðu að hún gæti verið tvíburasystir þín?“

Bordier var lengi að skrifa bréfið sem hún sendi systur sinni en í því bað hún hana að skoða myndirnar sem Bordier átti af sér á Facebook-síðu sinni. Þegar tvíburasystirin hafði loks samband sendi hún Bordier mynd af ættleiðingarskjölunum sínum – þær höfðu fæðst á sama sjúkrahúsinu. 

Þær töluðust við á Skype og komust að því að þær höfðu sömu kækina, talandann og þá voru þær með svipaða hárgreiðslu.

Potaði í hausinn á henni

Ekki leið á löngu áður en þær ákváðu að hittast og þær  sér mót í maí síðastliðnum í Lundúnum.  

„Ég var hrikalega stressuð,“ segir Bordier. „Þegar ég sá Sam í fyrsta skipti reyndi ég að stara ekki en hún byrjaði bara að hlæja. Ég gekk vandræðalega upp að henni og potaði í hana, mig langaði bara að snerta hana. Ég vissi hvað ég átti að gera,“ segir hún ennfremur.

„Við fórum og fengum okkur hádegismat og þurftum að stoppa margoft á leiðinni til að skoða spegilmyndir okkar í búðargluggunum. Þetta var eins og hliðstæður veruleiki. Við vorum svo líkar; hún brást við öllu nákvæmlega eins og ég. Við erum báðar vandræðalegar að eðlisfari, hún þarf ekki að afsaka sig við mig og hún skilur mig fullkomlega líka,“ segir hún.

Þær sendu munnvatn úr sér til greiningar og niðurstöðurnar staðfestu að þær væru eineggja tvíburar. „Þegar læknirinn greindi okkur frá niðurstöðunum sagði hann okkur að faðmast svo það er það sem við gerðum. Allir í kringum okkar fögnuðu eins og einhver hefði unnið fótboltaleik,“ segir Bordier.

Frásögn Anaïs Bordier má lesa í heild sinni á vef the Guardian.