Tvítugir Frakkar reyndu að smygla kókaíni

Tvær franskar konur sitja nú í gæsluvarðhaldi eftir að hafa reynt að smygla rúmlega 400 grömmum af kókaíni til landsins. Konurnar komu með flugi frá London í lok maí. Þetta kemur fram í tilkynningu frá lögreglustjóranum á Suðurnesjum.

Þar segir að tollverðir hafi grunað þær um græsku þegar í flugstöðina var komið, stöðvað þær og haft samband við lögregluna á Suðurnesjum. Stúlkurnar voru handteknar og færðar til rannsóknar.

Önnur þeirra reyndist hafa hluta efnanna innvortis en hin hafði komið þeim fyrir utan á líkama sínum. Þær eru báðar í kringum tvítugt að aldri. Rannsókn málsins er á lokastigi.

Lögreglan minnir á fíkniefnasímann 800-5005. Í hann má hringja til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann