Sérstakt að skora á Old Trafford

Gylfi Þór Sigurðsson verður eini Íslendingurinn í ensku úrvalsdeildinni í vetur. Hann þarf að fylgja eftir frábæru tímabili hjá sér í fyrra.

Þá skoraði Gylfi sjö mörk fyrir Swansea og gaf tíu stoðsendingar. Hann var í þriðja til fimmta sæti á lista yfir þá leikmenn sem gáfu flestar stoðsendingar í deildinni sem er ansi vel af sér vikið.

Stoðsendingarnar hefðu eflaust orðið fleiri ef hann hefði haft Wilfried Bony í liði með sér allt tímabilið.

Hélt með Man. Utd

Swansea hafnaði í áttunda sæti í deildinni á síðustu leiktíð og náði þess utan að vinna báða sína leiki gegn Man. Utd og Arsenal. Swansea varð þriðja liðið í sögu úrvalsdeildarinnar sem afrekar það.

„Þar sem ég var stuðningsmaður Man. Utd þegar ég var yngri þá var auðvitað mjög sérstakt að skora á Old Trafford,“ sagði Gylfi Þór er hann rifjar upp leikinn eftirminnilega á Old Trafford í fyrra.

„Það var líka mjög skemmtilegt að vinna Arsenal á útivelli þó að við værum í vörn í 85 mínútur. Það var mjög sérstakt að vinna þann leik.“

Getum gert betur

Swansea ætlar að byggja á þessum góða árangri frá síðustu leiktíð og Gylfi er sannfærður um að liðið geti gert enn betur í ár.

„Ef maður horfir yfir tímabilið í fyrra þá komu leikir þar sem við hefðum getað fengið meira út úr. Ég er á því að við getum gert enn betur þó svo tímabilið í fyrra hafi verið mjög flott,“ segir okkar maður.

Þurfum að taka næsta skref

Liði Swansea er stýrt af hinum 36 ára gamla Garry Monk og sá sannaði í fyrra að hann kann ýmislegt fyrir sér í fræðunum.

„Nú þurfum við að taka næsta skref. Mér fannst við vera frábærir í fyrra og tókum þá stórt skref fram á við. Ég er metnaðarfullur og vil taka annað stórt skref í viðbót. Sem þjálfari þá verður maður alltaf að vilja meira. Maður á aldrei að vera sáttur,“ segir Monk.

Til þess að bregðast við brotthvarfi Bony þá hefur Monk fengið framherjana Eder, sem kom frá Braga, og svo Andre Ayew frá Marseille í Frakklandi.

„Ég var búinn að ákveða snemma hvaða framherja ég vildi fá og við gengum frá kaupunum snemma. Þá koma þeir strax í hópinn og geta tekið fullan undirbúning. Mér finnst það skipta máli. Liðið er nánast fullmótað en það gætu fleiri komið á lokasprettinum.“

Enginvirðing fyrir Chelsea



Tímabilið byrjar með látum hjá Swansea því liðið sækir meistara Chelsea heim á morgun.

„Við munum mæta óhræddir og gera allt sem við getum til þess að gefa þeim leik. Við munum reyna að trufla þeirra leik og nýta þau tækifæri sem við fáum. Við erum ekki lið sem gefur neitt eftir og förum í þennan leik til þess að taka þrjú stig eins og alltaf.“

Framtíðin virðist vera björt hjá Swansea. Unglingalið félagsins er að spila í hærri styrkleikaflokki og svo stendur til að stækka heimavöll félagsins.

„Þetta er félag í uppbyggingu og við reynum að gera allt í réttum skrefum. Við verðum að flýta okkur hægt. Innviðirnir verða að vera sterkir sem og grunnurinn svo hægt sé að fljóta áfram í rétta átt. Takmarkið er að félagið verði sterkara með hverju árinu,“ segir Garry Monk.