Þolinmæðin þrotin og aðgerðir boðaðar

Vinnueftirlitið hyggst beita harðari aðgerðum en til þessa til að bæta öryggismál starfsfólks í fiskvinnslu. Teymi sérfræðinga stofnunarinnar mun heimsækja fiskvinnslufyrirtæki í sumar og haust og verður húsunum lokað undantekningarlaust ef öryggisbúnaður véla og tækja reynist ekki í lagi.

Forsaga málsins er sú að Vinnueftirlitið réðst í sérstakt átak til eftirlits með öryggismálum fyrirtækja í fiskvinnslu árið 2013. Þá sýndi slysaskráning stöðuga fjölgun vinnuslysa um langt árabil, ólíkt öðrum atvinnugreinum. Þrátt fyrir aðgerðir fækkaði slysum ekki árið 2014.

Vinnueftirlitið ákvað í ársbyrjun að grípa til frekari aðgerða og skoðaði teymi sérfræðinga ítarlega fimm stór fiskvinnslufyrirtæki í öllum landshlutum. Niðurstaðan var enn og aftur sú að öryggisbúnaði véla og tækja var allt of oft ábótavant. Hertar aðgerðir eru boðaðar og sérstöku eftirlitsátaki í sumar verður fylgt eftir með vinnustöðvun reynist búnaður ekki í lagi. Hefur forsvarsmönnum fyrirtækja verið tilkynnt þetta bréfleiðis.

Kristinn Tómasson, yfirlæknir hjá Vinnueftirlitinu, hefur enga einhlíta skýringu á því af hverju slysum fækkar ekki í fiskvinnslu eins og annars staðar. Um sé að ræða vel rekin fyrirtæki þar sem gæðastjórnunarkerfi ættu að vera til staðar svo ná megi góðum árangri er varðar vinnuvernd rétt eins og gæði þeirrar vöru sem frá fyrirtækinu kemur. 

„En þetta er ekki boðlegt. Umhverfið er í raun þannig að gera má hámarkskröfu um vinnuvernd. Við vonumst til, með því að fylgja þessum málum fast eftir, að þá fáist sameiginlegur skilningur á því að mestur hagur í fiskvinnslu fæst með því að vinnuvernd sé númer eitt, og þannig verði arður starfsfólks og eigenda mestur,“ segir Kristinn. 

Kristinn telur að fyrst og síðast þurfi að verða hugarfarsbreyting sem hverfist um það takmark að allir komi heilir heim. „Fyrir okkur sem þjóð hlýtur það að vera metnaðarmál að enginn slasist við gerð úrvals matvæla. Það er mikilvægt, og í raun grundvallaratriði að ná þessu inn sem metnaði í rekstri fyrirtækjanna.“