Vilja bráðaaðgerðir til bjargar byggð í Grímsey

Lagt er til að Grímsey verði gefinn 400 tonna byggðakvóti, að ferjusiglingum verði fjölgað umtalsvert sem og áætlunarflugi, húshitun í eynni verði endurbyggð sem og að Íslandsbanki afskrifi vaxtakostnað og endursemji um lán við sjávarútvegsfyrirtæki í eynni. Beinn kostnaður hins opinbera af þessum hugmyndum er áætlaður í kringum fimm hundruð milljónir króna. 

Aðgerðahópur um að hjálpa atvinnulífi og byggð í Grímsey leggur þessa tillögu á borð forsætisráðherra. Í hópnum sátu Höskuldur Þórhallsson og Steingrímur J. Sigfússon sem þingmenn kjördæmisins, Ingi Björnsson og John Júlíus Cariglia frá Íslandsbanka, Þorvaldur Lúðvíks Sigurjónsson frá Atvinnuþróunarfélagi Eyjafjarðar og lögmaður útgerðaraðila. Fulltrúi Akureyrar var Matthías Rögnvaldsson, forseti bæjarstjórnar. 

Eiríkur Björn Björgvinsson, bæjarstjóri Akureyrar, segir það skipta miklu máli að ná lausn á þeim vanda sem byggð í Grímsey stendur frammi fyrir. „Búseta í eynni á sér um 800 ára sögu og ég trúi því að allir Íslendingar vilji viðhalda byggð í eynni. Það er einnig ljóst að allir þeir aðilar sem koma að borðinu þurfa að leggja sitt af mörkum til þess að það takmark náist,“ segir Eiríkur Björn.

Lagt er til að Grímsey fái 400 tonna byggðakvóta og að Byggðastofnun og ráðuneyti atvinnumála móti reglur um hvernig veiðiheimildir nýtist sem best til að styrkja veiðar og vinnslu í Grímsey. Kvótinn er metinn á um 160 milljónir króna.

Einnig er lagt til að innanríkisráðuneytið leggi til fjárveitingu til að fjölga ferðum Sæfara sem siglir milli lands og eyjar allt árið um kring og að fjölga flugferðum milli Akureyrar og Grímseyjar.

Í þriðja lagi er lagt til að hafinn verði undirbúningur að því að byggja upp hitaveitu í Grímsey sem mun kosta um 80 milljónir króna.

Í fjórða lagi er lagt til að Akureyrarbær og Byggðastofnun starfi saman með málefni Grímseyjar og að fleiri tækifæri verði skoðuð fyrir byggð í eynni.

Matthías Rögnvaldsson segir vinnuna hafa gengið ágætlega. „Við í nefndinni skoðuðum til að mynda styrki við ferjuflutninga til Vestmannaeyja og við erum í raun að setja fram sams konar tillögur og er verið að vinna með þar,“ segir Matthías.