Samband myndlistar, íþrótta og markaðarins

Sex listamenn taka þátt í samsýningunni #KOMASVO sem verður opnuð í Listasafni ASÍ á laugardag. Á sýningunni er samband myndlistar, íþrótta og markaðarins skoðað.

„Staða listamannsins úti á markaðinum gagnvart efniviðnum núna er allt önnur en hún var í gamla daga. Það er ekki verið að vinna skúlptúra úr steini eða blanda málningu sjálfur. Núna er verið að nota mikið af tækjum og tólum sem tengjast nútímaheiminum,“ segir Íris Stefanía Skúladóttir, framkvæmdastjóri sýningarinnar, og bætir við: „Það eru vörumerki á þessum hlutum, þannig að myndlistarmaðurinn er alltaf hluti af markaðinum en reynir oft að fjarlægja sig frá honum. Það sem þeir eru að gera í þessari sýningu er að taka markaðinn fram og sýna hann.“

Íris segir íþróttir og myndlist í raun eiga vel saman þótt greinarnar séu oft á tíðum álitnar ótengdar.

„Listamennirnir hafa tileinkað sér mjög íþróttamannsleg vinnubrögð þegar þeir nálgast sýninguna. Það smitast inn í sýninguna bæði inn í vinnuferli og í afraksturinn.“

Liðsmennirnir hafa einnig tekið saman bylgjur álíkar þeim sem stuðningsmenn íþróttaliða gera oft. „Við höfum tileinkað okkur ákveðinn talsmáta eins og: Koma svo strákar! Þetta verður algjör negla!“ segir Íris.

Hópurinn hefur einnig staðið fyrir ljósmyndasamkeppni á Facebook og er hún hluti af sýningunni. Sú mynd sem fær flest „like“ vinnur, verður prentuð út og gefin Listasafni ASÍ á Safnanótt þann 6. febrúar.

Unnið hefur verið með fyrirtækjum á borð við Becks, Litróf og Kaffitár. „Það er oft verið að fela styrktaraðila í listum en ekki í íþróttum og við erum að reyna að tala bara mjög opinskátt um það hverjir koma að og hvernig,“ segir Íris, en einnig standa þau fyrir dósasöfnun til þess að styrkja sýninguna og eru gestir hvattir til þess að mæta með tómar dósir og flöskur á opnunina.

Listamennirnir sem taka þátt í sýningunni eru Ásgeir Skúlason, Leifur Ýmir Eyjólfsson, Nikulás Stefán Nikulásson, Sigurður Atli Sigurðsson, Sindri Snær Leifsson og Sæmundur Þór Helgason.

Sýningin verður opnuð í Listasafni ASÍ á laugardaginn klukkan þrjú.