Búið að sakfella í 35 af 40 vændiskaupamálum

Sakfellt hefur verið í 35 af 40 vændiskaupamálum sem ríkissaksóknari höfðaði í október síðastliðnum. Beðið er dóms í einu máli og á aðalmeðferð eftir að fara fram í fjórum málum.  

Mennirnir voru dæmdir til að greiða fésekt í öllum tilvikum. Í tíu málum neituðu ákærðu sök og voru þá dæmdir til að greiða 200.000 krónur fyrir fullframið brot eða 150.000 krónur fyrir tilraun til brots.

Í öðrum tilvikum játuðu mennirnir ýmist sök eða mættu ekki við þingfestingu fyrir dómi sem jafngildir játningu. Í þeim málum voru þeir dæmdir til að greiða 100.000 krónur í sekt.

Samkvæmt upplýsingum frá ríkissaksóknara voru þrír einstaklingar ákærðir fyrir aðild að tveimur málum og dæmdir fyrir þau.