Hæstaréttardómarar ósammála: Þinghald í vændiskaupamáli verður lokað

Hæstiréttur staðfesti í gær úrskurð Héraðsdómur Reykjavíkur frá því fyrr í mánuðinum að þinghald skuli vera lokað í máli fjörutíu einstaklinga sem ákærðir hafa verið fyrir vændiskaup eða tilraun til vændiskaupa. 

Ákæruvaldið krafðist þess að þinghald yrði opið en Sveinn Andri Sveinsson, verjandi eins mannanna, mótmælti því.

Í dómi héraðsdóms kemur fram að þinghald eigi að vera lokað til að hlífa konunni sem maðurinn keypti vændi af. Er fallist á þá niðurstöðu með dómi Hæstaréttar.

Einn dómaranna, Guðrún Erlendsdóttir, skilaði sératkvæði í málinu.

Vísaði hún í greinargerð með frumvarpi um að kaup á vændi skyldu vera refsiverð, en þar kom fram að tilgangur laganna væri að sporna við sölu á kynlífi. Að mati Guðrúnar verður þeim tilgangi frekar náð með því að hafa þinghald í vændiskaupamálum opið.