Sjáðu myndbandið úr rútunni: Nemendurnir komast loksins af stað

Einn nemandanna sem fastir voru í rútu á Djúpvegi síðustu nótt birti myndband á Facebook-síðu sinni fyrr í dag. Það sýnir stundina þegar rútan komst loks yfir staðinn norðan Hólmavíkur þar sem vegurinn hafði farið í sundur.

Sigurveig Anna Gunnarsdóttir birti myndbandið og var hress þegar Vísir náði tali af henni um klukkan 20 enda var rútan þá á leið yfir staðinn sem hafði farið í sundur á veginum sunnan Hólmavíkur. Viðgerð Vegagerðarinnar á Djúpvegi lauk skömmu fyrir klukkan 20 í kvöld.

Sextíu unglingar úr Fjölbrautarskólanum á Sauðárkróki voru fastir í rútunni alla nóttina eftir að þjóðvegurinn norðan Hólmavíkur grófst í sundur vegna vatnavaxta. Unglingarnir höfðust við í fjöldahjálparstöð Rauða krossins, sem opnuð var í félagsheimilinu á Hólmavík um hádegisbil í dag, en héldu för sinni áfram á Sauðárkrók strax eftir að boð barst um að viðgerð á veginum væri lokið.

Nemendurnir voru nú um helgina í vinaskólaheimsókn í Menntaskólanum á Ísafirði.

Post by Sigurveig Anna Gunnarsdóttir.