Hefur verið ofsótt af manni í tuttugu ár

„Lögreglan gerði ekkert. Það þótti ekki nóg að hann hótaði að koma heim til mín í bræðiskasti, hann hefði þurft að vera mættur inn á stofugólf,“ segir kona, sem var ofsótt um margra mánaða skeið af gömlum kunningja. Konan gagnrýnir viðbrögð lögreglu sem hún segir að hafi verið áhugalaus um þá hættu sem að henni steðjaði.

Maðurinn setti sig í samband við konuna í október á síðasta ári. Hann vildi taka upp gömul kynni og var frekur á tíma hennar. Þegar hún reyndi að slíta samskiptum við manninn hóf hann að ofsækja hana.

Maðurinn sendi henni ógnandi skilaboð í gegnum netið um það hvernig hann ætlaði að nauðga henni og hvers konar pyndingar hún þyrfti að þola af hendi hans. Ofsóknunum lauk nokkrum mánuðum síðar þegar fjölskylda mannsins greip inn í.

Önnur kona, sem Fréttablaðið ræddi við, hefur þurft að þola ofsóknir í tuttugu ár. Hún vill ekki koma fram undir nafni þar sem ofsóknunum hefur ekki linnt enn.

Konan hitti manninn sem ofsækir hana fyrst í Reykjavík þegar hún bjó sjálf í sjávarþorpi á Suðurlandi. Maðurinn óskaði eftir kynnum við hana sem hún neitaði. Það var þá sem ofsóknirnar hófust.

Maðurinn heimsótti meðal annars heimabæ konunnar og spurðist fyrir um hana. Síðar lét hann þann orðróm ganga að hann væri faðir dóttur hennar og væri kominn til að hitta hana.

Hann hefur ítrekað beðið fólk fyrir kveðju til hennar. Því segir hann að konan sé góð vinkona sín sem hann ann mjög heitt. Maðurinn hefur líka hringt heim til konunnar og elt hana á göngu um miðbæinn.

Í gegnum árin hefur maðurinn bæði nálgast hana og dóttur hennar á förnum vegi. Hann hefur oft sent konunni póstkort í gegnum þriðja aðila frá öðrum löndum. Þá sér hún hann oft fyrir utan heimili sitt og vinnu.

Konan segist hætt að óttast að maðurinn vinni henni mein. Hún hefur þó áhyggjur af því að maðurinn, sem virðist hafa tengst dóttur hennar, muni snúa sér alfarið að ofsóknum á hendur henni. Henni þyki hræðileg tilhugsun að dóttirin, sem nú er á þrítugsaldri, hafi alltaf þurft að búa við ofsóknir og áreiti af hendi mannsins.

Um það bil eitt hundrað konur hafa leitað til Kvennaathvarfsins á síðustu fimm árum vegna ofsókna. Ofsóknirnar eru oftast af hendi fyrrverandi maka eða kærasta.

Friðrik Smári Björgvinsson yfirlögregluþjónn segir mál sem þessi oft flókin. „Ef menn eru ekki að brjóta neitt af sér þá er erfitt fyrir lögreglu að aðhafast. Ef það er ekki nálgunarbann í gildi þá er ekkert sem bannar fólki að vera fyrir utan hús eða að hringja. Það verður þá að vera komið upp á eitthvað ákveðið stig til að hægt sé að meta það sem brot á friðhelgi. Lagaramminn er bara þessi.“