Haldið sofandi í öndunarvél

Stúlkunni sem slasaðist alvarlega í bílveltu á Seyðisfirði í gær er enn haldið sofandi í öndunarvél.

Önnur kona var með henni í bílnum en þær voru báðar fluttar með sjúkrabíl til Egilsstaða og þaðan með sjúkraflugi til Reykjavíkur. Hin konan var úrskurðuð látin við komuna á gjörgæsludeild Landspítalans.

Að sögn Önnu Sigrúnar Baldursdóttur aðstoðarmanns forstjóra Landspítalans fór stúlkan sem slasaðist í aðgerð í gær en Anna gat ekki gefið upp um frekari líðan eða horfur.

Minningarstund fór fram í Seyðisfjarðarkirkju í gær vegna slyssins.