Lögregla leitar bresks ferðamanns

Björgunarsveitir hafa verið kallaðar til leitar að breskum ferðamanni á Þingvöllum. Maðurinn heitir Benjamin Stokes og er fæddur 13. maí 1978. Ekki eru fyrir hendi upplýsingar um klæðnað hans.

Í frétt á vef lögreglunnar segir að bílaleigubifreið hans, svört Chevrolet Spark fólksbifreið, hafi fundist við Uxahryggjaveg, skammt neðan við Skógarhóla og er talið að hún hafi staðið þar síðan á mánudag síðastliðnn.

Maðurinn átti bókað flug frá Keflavíkurflugvelli í morgun klukkan 10 en skilaði sér ekki í innritun þar.    „Athygli lögreglu var upphaflega vakin á tilvist bifreiðarinnar á þessum stað og hefur því eftirgrenslan staðið yfir í nokkurn tíma.“

Lögreglan hvetur þá sem geta gefið upplýsingar um ferðir Benjamin Stokes hér á landi til þess að hafa samband í síma 444-2010 eða með tölvupósti á sudurland@logreglan.is.

Uppfært 14:50: Benjamin Stokes er fundinn eins og lesa má úr tilkynningu lögreglu hér að neðan.

Breski ferðamaðurinn sem leitað hefur verið að á Þingvöllum frá því í morgun er fundinn. Hann var á göngu við Botnsúlur þegar leitarmenn í þyrlu LHG komu auga á hann. Maðurinn var fluttur með þyrlunni á sjúkrahús í Reykjavík. Hann var þreyttur og illa áttaður en að öðru leiti vel á sig kominn.

Lögregla þakkar leitarmönnum öllum vel unnin störf.