Elskuð og hötuð- Söngvaborg fagnar fimmtán ára afmælinu í dag

„Við höfum ekki fundið fyrir samdrætti í sölu DVD-diskanna,“ segir Sigríður Beinteinsdóttir söngkona og önnur kvennanna á bak við einhverja lífseigustu barnapíu landsins, Söngvaborgardiskana sem fagna í dag fimmtán ára afmæli.

Sigga er þó ekki ein því þær María Björk Sverrisdóttir mynda tvíeykið sem hefur skemmt íslenskum börnum allan þennan tíma. „Við áttum alls ekki von á því þegar við byrjuðum fyrir fimmtán árum að vera að undirbúa sjöunda diskinn,“ segir Sigga og skellir upp úr. Hún segir að þær Mæja hafi þróað Söngvaborg saman árið 2000 og hafi heldur betur vaxið fiskur um hrygg, og seljist fyrstu diskarnir enn vel. „Nú eru börnin á þeim diskum orðin að fullorðnu fólki og að minnsta kosti eitt þeirra orðið foreldri sjálft,“ skýtur Sigga að.

Lögin sem þær stöllur hafa gætt lífi á mynddiskunum hlaupa á fleiri tugum, og segir Sigga þær velja gaumgæfilega hvað skuli sett á diskana. „Við veljum eftir kúnstarinnar reglu og prófum lögin á börnum og sjáum hvað er að virka. Við fáum mikið að heyra að fólk sé að kaupa sömu diskana aftur og aftur þegar þeir hafa rispast til óbóta, og viðurkenna sumir foreldrar að þeir séu orðnir nett þreyttir á okkur Maríu,“ segir Sigga og hlær sínum dillandi hlátri. „En oftast bæta þeir svo við að þetta sé afbragðs barnapía.“ Geta foreldrar því farið að hlakka til, því nýja efnið kemur út í október á þessu ári.

Munu þær María og Sigga fagna þessum merku tímamótum í dag í Fjölskyldu- og húsdýragarðinum, sem einnig heldur upp á afmæli, því garðurinn blæs til mikillar gleði í tilefni tuttugu og fimm ára afmælis skemmtigarðarins.

„Þarna verður mikið húllumhæ. Við byrjum okkar dagskrá á sviðinu klukkan tvö en garðurinn byrjar sitt afmælisfjör strax við opnun,“ útskýrir Sigga og bætir við að á sviðið munu allar persónurnar sem kíktu í heimsókn í Söngvaborg undanfarin fimmtán ár stíga og sprella, og má þar helsta nefna Masa og Georg. Einnig kíkja hinir ýmsu gestir við, svo sem Alda Dís Kristjánsdóttir, sigurvegari Ísland Got Talent, en hún mun syngja Disney-lög fyrir afmælisgestina.



Aðspurð um hvernig sé að horfa um öxl á þessum tímamótum segist Sigga finna til mikillar gleði. „Þetta hefur verið ofsalega gaman og ekki síst gefandi. Þetta er langur tími, en á sama tíma virkar þetta svo agalega stutt.“