Hlaupurum í Color Run bannað að fara í Strætó

Þátttakendum Color Run á Íslandi var bannað af vagnstjórum að ferðast með strætisvögnum Strætó bs. eftir hlaupið. Þetta staðfestir Jóhannes Rúnarsson, framkvæmdastjóri Strætó, í samtali við Vísi.

Hann segir þessa ákvörðun hafa legið fyrir áður en hlaupið hófst. „Og er í samræmi við reglur sem gilda um óhreinindi í strætó. Þetta gilti einnig á veitingastöðum, þátttakendum var bannað að fara þar inn.“

Hann segir þessa ákvörðun Strætó bs. ekki hafa átt að koma nokkrum á óvart. „Ég myndi ekki segja það. Ég held að þegar þú sjáir þetta fólk þá skiljir þú það vel. Það var rætt um það við vagnstjórana að meta þetta út frá reglunum.“