Hálf milljón fyrir orminn

„Í ljósi bókunar sannleiksnefndar samþykkir bæjarstjórn að sjá til þess að verðlaunaféð vegna myndar af Lagarfljótsorminum verði greitt út,“ segir í samþykkt bæjarstjórnar Fljótsdalshéraðs sem þar hefur skorið úr um hvort myndband sem Hjörtur Kjerúlf bóndi tók í febrúar 2012 sýni Lagarfljóts­orminn.

Af þrettán meðlimum sannleiksnefndar sögðu sjö myndskeið Hjartar vera af Lagarfljótsorminum, fjórir að svo væri ekki og tveir voru ekki vissir. Niðurstaðan var kynnt í ágúst í fyrra en það er ekki fyrr en nú sem bæjarstjórnin samþykkir að greiða út hálfrar milljónar króna verðlaunafé sem sveitarfélagið hafði heitið fyrir mynd af orminum.