Mikið fjölgað á árinu hjá Kvennaathvarfinu

Mun fleiri hafa leitað til Kvennaathvarfsins á árinu sem er að líða en á síðasta ári. Í október höfðu fleiri komið í viðtöl til Kvennaathvarfsins en allt síðasta ár.

Þann tólfta janúar síðastliðinn skrifuðu Dagur B. Eggertsson borgar­stjóri og Sigríður Björk Guðjónsdóttir, lögreglustjóri á höfuðborgarsvæðinu, undir samstarfssamning um átak gegn ofbeldi. Markmið samningsins var að bæta verklag lögreglunnar og annarra fagaðila í heimilisofbeldismálum.

Sigþrúður Guðmundsdóttir, framkvæmdastýra Kvennaathvarfsins, segir að strax þá hafi mikil fjölgun orðið á þeim sem leituðu til athvarfsins vegna ofbeldis. „Það voru hundrað konur hjá okkur í dvöl í fyrra en þær verða að minnsta kosti 120 á þessu ári,“ segir Sigþrúður.

Að sögn Sigþrúðar skilar umræða í þjóðfélaginu sér jafnframt í fjölgun. Þá sé fagfólk duglegra að ráðleggja konum að leita til athvarfsins.

Um jólin voru níu manns, konur og börn, í kvennaathvarfinu. Sigþrúður segir að þá leiti konur til athvarfsins á milli jóla og nýárs, alveg eins og gengur og gerist aðrar vikur ársins. Hún segir þó ekki endilega líklegra að konur komi á nýársnótt en jólanótt, þrátt fyrir að margir kunni að draga þá ályktun vegna mikillar áfengisneyslu um áramót.

„Með nýju verklagi lögreglunnar á að fækka þeim tilvikum þar sem konur koma á náttkjólnum úr miðju ofbeldisatviki. Það er algengt að við lesum í fjölmiðlum um fimm útköll vegna heimilisofbeldis þá nóttina en ekkert þeirra kom til okkar. Þær sem eru beittar ofbeldi á nýársnótt skila sér svo kannski tuttugasta janúar.“

Fjárframlag til Kvennaathvarfsins hækkaði um ríflega fimm milljónir á nýjum fjárlögum og verður 70,6 milljónir króna á árinu. Þá hefur athvarfið samning við Reykjavíkurborg um fjárframlög. Framlögin duga fyrir daglegum rekstri, launakostnaði starfsmanna, hita og rafmagni auk matar fyrir dvalarkonur og börn.