Ágústspá Siggu Kling – Hrútur: Kominn tími á u-beygju

Elsku magnaði Hrútur. Gefðu meira en þú þiggur og elskaðu meira en þú þarft.

Núna er með þér kraftur sem mun fylgja þér út sumarið. Þú ert að byggja upp magnaða framtíð! Grunnurinn er kominn en þú sérð ekki alveg hvert næsta skref er og einmitt þess vegna ertu að lesa þetta!

Ef þú sest niður og skoðar síðustu 12 mánuði þá sérðu að það hefur ansi margt gerst. Nú er góður tími til að grípa um stýrið í lífi þínu, setjast í framsætið og taka stóra u-beygju.

Það eru margir sem skulda þér greiða þó svo að þú gefir allt skilyrðislaust. Þú finnur að ákvarðanir þínar gefa þér kraft og það er áhrifamikið fólk sem mun hjálpa þér næstu skrefin. Ekki hugsa um hið gamla því það er búið og núna er núið.

Settu mildan tón í röddina þína og taktu alla hörku úr henni. Þessi kraftur í röddinni þinni er einkenni þitt og flestir þekkja þig til dæmis í síma. Nú skaltu hringja í þá sem geta hjálpað þér og ekki fresta neinu því frestunarárátta étur hugrekkið.

Og fyrir þá sem vantar ástina í líf sitt eru skilaboðin: Þú finnur ekki ástina því hún mun finna þig.

Mottó: Halló heimur, ég er kominn!

Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir Pírati, Anna Svava Knútsdóttir leikkona, Elton John söngvari, Þóra í Atlanta, Sigmar Guðmundsson sjónvarpsmaður, Kristín Þorsteinsdóttir, aðalritstjóri 365 miðla.