Viggó Sigurðsson segir brotið á atvinnufrelsi sundkennara

Viggó Sigurðsson, sund- og íþróttakennari, segir stétt sína æfa vegna hæfnisprófs sem kennararnir þurfa nú að gangast undir hæfnispróf á ársfresti.

„Það er verið að fara fram á að við eigum að mæta á hverju ári á eitthvað sundnámskeið og taka svo hæfnispróf þar sem við eigum að synda 600 metra á innan við tuttugu mínútum, hraðsund 25 metra á þrjátíu sekúndum, björgunarsund í fötum, köfunarsund og svo framvegis. Síðan eigum við að seitja námskeið, sem ég sat reyndar síðastliðinn föstudag. Það stendur að það sé sundnámskeið,“ segir Viggó en hann heimsótti morgunþátt Bylgjunnar Bítið í morgun.

Situr þegar góð skyndihjálparnámskeið

Viggó sat námskeiðið en neitaði að taka þolpróf, hann segist þegar hafa tekið það, setið skyndihjálparnámskeið og sé auk þess með leyfisbréf til þess að kenna sund. „Kennarinn var ekki kennararmenntaður sem kenndi á námskeiðinu, hann sagði sjálfur að hann hefði ekki hundsvit á sundaðferðum eða neitt slíkt,“ útskýrði Viggó. „Þetta var bráðatæknir frá slökkviliðinu í Reykjavík.“ 

Viggó segist sækja skyndihjálparnámskeið reglulega starfi síns vegna og að það geri hver sundkennari sem hefur metnað fyrir sínu starfi. „Ég var að klára tólf tíma skyndihjálparnámskeið. Þetta námskeið sem ég var á á föstudaginn var einn og hálfur tími.“ Hann segir að það hafi að mestu leyti verið snakk en lítið um haldbæra kunnáttu eða reynslu. 

Viggó segir að fyrirmælin komi frá umhverfisráðuneytinu og að verið sé að láta sundkennara gangast undir sund- og laugarvarðapróf. „Ég er ekki laugarvörður, ég er kennari,“ segir Viggó sem er mjög ósáttur við gang mála.

Kennarar - ekki laugarverðir

Hann skilur ekki hvers vegna þessar breytingar eru taldar nauðsynlegar en þær tóku gildi með reglugerð nr. 205/2014 sem er sett með stoð í reglugerð um hollustuhætti og mengunarvarnir nr. 7/1998.

„Við erum ekki laugarverðir og heldur ekki starfsmenn sundstaða. Við erum kennarar við skóla; grunnskóla og framhaldsskóla á landinu.“ Viggó telur reglugerðina ekki standast lög þar sem fyrirmælin skerði atvinnufrelsi og –rétt sundkennara. Ef þeir standast ekki hæfnispróf megi þeir ekki kenna. Viggó telur þetta brot gegn stjórnarskrárvörðum rétti manna til að stunda atvinnu sína – hann bendir á að kennarar, íþróttakennarar þar með taldir að sjálfsögðu, hafi sótt fimm ára háskólanám og hafi undir höndum leyfisbréf til þess að sinna starfi sínu.

„Þetta er algjör árás og ofbeldi gagnvart okkur sundkennurum. Við stöndum bara berskjaldaðir í þessu af því að stéttarfélagið okkar stendur ekki einu sinni með okkur,“ segir Viggó en hann fékk þær upplýsingar að samkomulag hafi verið gert milli ráðuneytis og stéttarfélags um þessar reglur.

Málið einkennist af rökleysu og þvælu

Hann segir málið einkennast af endalausri rökleysu og þvælu. „Þetta er algjört bull. Ég spurði einn nefndarmann sem kom að þessari nefnd sem er íþróttakennari við Kennaraháskólann hvað það hefði með það með sundkennslu að ég gæti synt 600 metra á tuttugu mínútum. Svarið var sem er akkúrat sama rökleysan og er í öllu þessu máli að ég gæti lent í því að vera úti á vatni í bát og gæti þurft að keyra í land.“

„Við að kenna sund?“ spurði þáttastjórnandi í spurnartón. „Já nákvæmlega,“ svaraði Viggó en hann ætlar með málið í hart. „Ég bý svo vel að konan mín er lögfræðingur. Ég er bara að fara í málið.“ 

Hlusta má á viðtalið við Viggó Sigurðsson hér að ofan.