„Hann syngur eins og kólibrífugl í mín eyru“

Mikill hiti er í umræðum á Alþingi eftir að Gunnar Bragi Sveinsson utanríkisráðherra gerði grein fyrir bréfi sínu til Evrópusambandsins um slit á aðildarviðræðum. Hann sagði það alveg skýrt að umsóknin hafi verið afturkölluð en ekki eru allir þingmenn því sammála.

Gunnar Bragi flutti munnlega skýrslu á bréfinu á þriðja tímanum í dag. Það er meðal annars vegna þess að túlkun bréfsins hefur vafist fyrir ýmsum; þingmönnum og Evrópusambandinu. Formleg þýðing bréfsins er enn óljós og um það er nú tekist á Alþingi.

Össur Skarphéðinsson, þingmaður Samfylkingarinnar og fyrrverandi utanríkisráðherra, spurði hvort bréf Gunnars Braga feli í sér einhver stjórnskipuleg eða málefnaleg rök gegn því að ríkisstjórn geti tekið upp þráðinn aftur án þess að til þess sé samþykkt sérstök þingsályktun. Gunnar Bragi svaraði því þannig að ekki væri hægt að binda næsta þing, það sé ákvörðun annarrar ríkisstjórnar að ákveða hvort hún sæki um að nýju. Fyrst þurfi þó að spyrja þjóðina.

Össur sagðist fagna svari ráðherrans. „Hann syngur eins og kólibrífugl í mín eyru. Þetta var svarið sem ég vildi fá. Hæstvirtur ráðherra hefur staðfest það núna, sem er í andstöðu við það sem hann hefur verið að segja suma dagana, að ekkert í bréfi hans felur í sér neina stjórnskipulega tálma gegn því að ný ríkisstjórn taki upp málið og endurveki það með þeim hætti sem hún kýs,“ sagði Össur.

Honum þótti Gunnar Bragi þó heldur óskýr í máli sínu. Að á þremur dögum hefðu skoðanir hans verið jafn margar og því sé að túlka orð hans.

Gunnar Bragi hvatti þá þingmanninn til að leggja betur við hlustir í stað þess að snúa út úr. Hann muni þó ekki heyra frá sér kólibrísöng.

„Ég vitna til orða minna í upphafi að háttvirtur þingmaður eigi það til að vera dálítið skrítilegur í sínum ræðum og því sem hann túlkar frá fólki [...] Það er alveg kristaltært að mínu viti að ríkisstjórn sem hyggur að ætla sér að fara aftur af stað í viðræðru við Evrópusambandið að hún eigi að koma hér inn í þingið og þurfi til þess að koma inn í þingið með nýja tillögu til að fara af stað að nýju,“ sagði Gunnar Bragi. Þingmenn sögðu það ganga þvert á orð hans.