Fimmtán milljónir í kynjarannsóknir

Jafnréttissjóður auglýsir eftir umsóknum um styrki úr sjóðnum fyrir árið 2015 en tilgangur sjóðsins er að efla kynjarannsóknir og stuðla þannig að bættri stöðu kvenna og karla og framgangi jafnréttis.

Í frétt á vef Jafnréttisstofu kemur fram að sjóðurinn hafi 15 milljónir til að úthluta styrkjum í ár og er miðað við að styrkir séu ekki færri en þrír og ekki fleiri en fimm. Gerðar eru skýrar faglegar og fræðilegar kröfur til umsækjenda og hvorki verða veittir styrkir til verkefna sem þegar er lokið né meistararitgerða.

Umsóknarfrestur rennur út á miðnætti í lok sunnudagsins 23. ágúst 2015 og verður úthlutað úr sjóðnum á degi Sameinuðu þjóðanna, þann 24. október 2015.

Vakin er athygli á því að umsækjendum er gert að sækja rafrænt um á eyðublaðavef ráðuneytanna en nánari upplýsingar má nálgast hér.