Átján ára ákærður fyrir tvær grófar líkamsárásir

Átján ára piltur hefur verið ákærður af ríkissaksóknara fyrir tvær sérstaklega hættulegar líkamsárásir. Þá er honum einnig gefið að sök að hafa kýlt sextán ára stúlku með krepptum hnefa í andlitið. Hann var sjálfur sautján ára þegar árásin átti sér stað.

Önnur sérstaklega hættulega líkamsárásin var fyrir utan skemmtistaðinn Kaffi Amor við Strandgötu á Akureyri um Verslunarmannahelgina í ágúst 2014. Þar er hann sakaður um að hafa ráðist á 22 ára karlmann, slegið með krepptum hnefa í andlitið í tvígang og sparkað af miklu afli í höfuð hans. Afleiðingar árásarinnar voru þær að maðurinn hlaut þriggja sm langan skurð á hvirfli sem sauma þurfti saman.

Réðust tveir á einn

Hin sérstaklega hættulega líkamsárásin átti sér stað við Baldursgötu í Reykjavík sléttum tveimur vikum síðar en þá var ákærði í félagi við annan pilt, tveimur árum yngri. Eru þeir sakaðir um að hafa ráðist á sautján ára pilt með því að slá hann með krepptum hnefa í andlitið og sparkað báðir ítrekað í höfuð hans þar sem hann lá á götunni.

Pilturinn hlaut aflögun á nefi, brotna framtönn, mar á eyra og eymsli yfir kinnbeinum. Í einkaréttarkröfu er krafist tæplega 5,6 milljóna króna í miskabætur vegna árásarinnar.

Kýldu stúlku

Þá er átján ára pilturinn einnig ákærður fyrir að hafa kýlt stúlku árinu yngri með krepptum hnefa í gleðskap í Reykjavík í nóvember 2013. Féll hún niður stiga með þeim afleiðingum að hún hlaut skurð á vinstri augabrún sem þurfti að sauma saman. Þá fékk hún mar á augnlok og augnsvæði og sömuleiðis mar á læri. Farið er fram á rúma hálfa milljón króna í miskabætur.

Að lokum er pilturinn ákærður fyrir að hafa ýtt við lögreglumanni í kyrrstæðum strætisvagni við Hringbraut í fyrrasumar. Ýtti hann með báðum höndum í búk lögreglumannsins þegar lögregla hafði afskipti af piltinum í vagninum.