Norrænir ráðherrar tilkynna um aukið varnarsamstarf

Norðurlöndin hyggjast auka varnarsamstarf sitt til að bregðast við þeirri auknu ógn sem stafar af Rússlandi og auknum umsvifum þeirra í Eystrasalti.

Frá þessu greina varnarmálaráðherrar fjögurra Norðurlanda og Gunnar Bragi Sveinsson utanríkisráðherra í skoðanagrein sem birtist í norska blaðinu Aftenposten og sagt er frá í kvöld. Skoðanagreinina má túlka sem ígildi yfirlýsingar.

Með samstarfinu er ætlunin að bregðast við „árásargirni Rússa í garð Úkraínu“ og auknum hernaðarumsvifum Rússa í Eystrasalti þar sem sem landhelgisbrot hafa ítrekað verið framin.

„Náið samstarf Norðurlandanna og samstaða með Eystrasaltsríkjunum stuðlar að auknu öryggi á svæði okkar,“ segja ráðherrarnir og nefna fjölmörg svið þar sem til stendur að auka og efla varnarsamstarf ríkjanna.

Sameiginlegt loftrýmiseftirlit á dagskrá

Ráðherrarnir nefna sérstaklega að til standi að halda fleiri sameiginlegar varnaræfingar, auka samstarf ríkjanna í alþjóðlegum verkefnum, auka upplýsingaskipti, vera með sameiginlegt loftrýmiseftirlit og auka samstarf á sviði iðnaðar og varnarmála.

Ráðherrarnir segjast jafnframt sjá kosti þess að bjóða öðrum ríkjum og stofnunum að halda æfingar á Norðurlöndum til að kynnast þannig nærumhverfinu á Norðurlöndum. Nefna þeir sérstaklega fyrirhugaða NATO-æfingu í Noregi í því samhelgi.

Undir greinina skrifa Ine Eriksen Søreide, varnarmálaráðherra Noregs, Nicolai Wammen, varnarmálaráðherra Danmerkur, Carl Haglund, varnarmálaráðherra Finnlands, Peter Hultqvist, varnarmálaráðherra Svíþjóðar og Gunnar Bragi Sveinsson utanríkisráðherra.