Bruni á Selfossi: Slökkvistarfi að ljúka

Grunur leikur á um íkveikju hafi verið að ræða þegar eldur braust út við plastsmiðjuna Set á Selfossi á sjöunda tímanum í kvöld. Eldurinn blossaði upp á geymslulager fyrir fullunnar vörur fjarri framleiðslubyggingum. Allt tiltækt slökkvilið frá Selfossi og Hveragerði var kallað út og náðist að ráða niðurlögum eldsins upp úr klukkan níu.

„Að öllum líkindum, eins og staðan er núna, hefur einhver verið að fikta með eldspýtur,“ segir Kristján Einarsson, slökkviliðsstjóri hjá Brunavörnum Árborgar. Töluvert tjón hlaust af eldinum og mikil framleiðsla varð eldinum að bráð.

Mikinn reyk lagði frá svæðinu og þau hús sem fengu mestan reyk á sig voru rýmd. Starfsfólk Rauða krossins og björgunarsveita opnuðu fjöldahjálparstöð í Vallaskóla og var á annan tug fólks sem færði sér hana í nyt.

Kristján vill einnig biðla til fólks sem finnur fyrir einkennum reykeitrunar, þó ekki sé nema vottur, að láta líta á það.

Í tilkynningu frá Set, sem send var fjölmiðlum fyrir skemmstu, kemur fram að aðstandendur fyrirtækisins harmi atburðinn og leggja áherslu á að mikið hefur verið unnið að umbótum og bættu verklagi við starfsemina með tilliti til öryggismála. Set ehf vill koma þökkum til Brunavarna Árnessýslu og annara slökkviliða sem komu að aðgerðunum í kvöld. Set vill einnig koma afsökunarbeiðni á framfæri við þá bæjarbúa sem kunna að hafa orðið fyrir óþægindum af þessari uppákomu.

Fréttin var síðast uppfærð kl. 21.45.

Hér að neðan má sjá myndband sem Sigþór Constantin Jóhannsson sendi fréttastofu.