Norsk hjón fundust látin í Rússlandi

Norsk hjón á þrítugs- og fertugsaldri fundust á fimmtudag látin í íbúð í bænum Murmansk í Rússlandi. Dánarorsök þeirra er ókunn, en rússnesk og norsk lögregluyfirvöld rannsaka nú málið, að því er fram kemur í frétt norska dagblaðsins Verdens Gang.

Hjónin voru búsett í Suður-Varanger en voru á ferðalagi í Murmansk ásamt börnum þeirra tveimur. Börnin voru í heimsókn hjá fjölskyldumeðlimum þegar foreldrar þeirra fundust.

Lögregla vill ekki segja til um hvort sakamál sé að ræða fyrr en búið er að kryfja lík hinna látnu.