Skilur eftir ókeypis öryggi fyrir nágrannana um hátíðarnar

„Ég er nú bara rafvirki og hef oft lent í því að fólk hringi hingað um hátíðarnar í vandræðum. Þess vegna datt mér í hug að gera þetta,“ segir Árni Pétursson, sem hefur komið fyrir plastkassa fyrir framan útidyrahurð sína á Bollagörðum á Seltjarnarnesi með flestum gerðum af öryggjum.

Árni lét nágranna sína vita af þessu í Facebook-hóp fyrir íbúa á Seltjarnarnesi og segir þeim að koma bara og taka öryggi sér að kostnaðarlausu ef þau þurfa á þeim að halda yfir hátíðarnar.

„Vonandi fer sem minnst af þessu, fólksins vegna,“ segir Árni og hlær. Þetta er í fyrsta sinn sem hann setur út kassa fyrir jólin en hann hefur undanfarin ár skreytt ljósastaura í botnlanganum þar sem hann býr fyrir hátíðarnar.

Nágrannar Árna hrósa honum fyrir uppátækið í athugasemdum á Facebook en hann segir það koma sér á óvart hversu margir hafa tjáð sig um þetta.

„Það er allavega jákvætt skrifað, það mætti vera meira af því,“ segir hann.