Sævar Helgi, þessa dagana sjást tvær mjög skærar stjörnur á austurhimninum á morgnana þegar bjart er í lofti. Hvað heita þær? Þetta eru Júpíter og Venus. Þær verða áberandi næstu vikurnar, Júpíter hækkar á lofti en Venus lækkar.

Eftir áramótin hverfa þær sjónum okkar smátt og smátt en eftir 500 daga eða svo munum við sjá Venus aftur á himninum. Þá verður hún orðin kvöldstjarna og mun sjást vinstra megin við sólina.

Hvað geturðu sagt okkur um Sjöstirnið? Sjöstirnið er líka kallað Systurnar sjö og eru í stjörnumerkinu Nautinu. Þetta er hópur af stjörnum sem eru mjög þétt saman og líta út eins og innkaupakerra og er í Subaru-lógóinu.

Sjöstirnið fæddist úr gas- og rykskýi fyrir um það bil 100 milljón árum og inniheldur um 1.000 stjörnur en við sjáum bara þær björtustu. Allar eru í svona 400 ljósára fjarlægð ef ég man þetta rétt.

Svo er til annað fyrirbæri sem heitir Karlsvagninn sem lítur ekkert ósvipað út en er stærra.

Hvað er að frétta af Fjósakonunum og og Fiskikörlunum? Fjósakonurnar eru þrjár stjörnur í beinni röð með jöfnu millibili og eru með stærstu og öflugustu stjörnum sem við sjáum á himninum. Þær eru um 25 til 30 þúsund gráðu heitar.

Fjósakonurnar eru belti Óríons. Niður úr beltinu hangir svo sverðið, það eru Fiskikarlarnir, þrjár stjörnur í beinni röð, mun daufari og með styttra millibili en fjósakonurnar.

Í miðju Fiskikarlanna er geimþoka, sem heitir Sverðþokan í Óríon, það er stjörnumyndunarsvæði, nokkurs konar stjörnuverksmiðja.