Nóvemberspá Siggu Kling – Tvíburi: Þú verður þá að leggja allt undir

Elsku margliti tvíburinn minn. Þú ert svo mikil ævitýramanneskja og það þarf alltaf að vera svo mikið að gerast hjá þér til þess að þú sért hamingjusamur.

Þú þarft að staldra við og anda, í rauninni bara hugleiða. Þú þarft að einbeita þér að því að taka eftir umhverfi þínu því það er svo margt að gerast sem er að gera þér gott. En þú tekur bara ekki eftir því af því að þú ert alltaf á þönum.

Það er búið að vera mikið álag á þér tilfinningalega og síðasta ár var ekki alveg það besta en núna ert þú að spyrna við fótum og það er eins og þú sért að skjótast úr kafi með ógnarhraða upp á yfirborðið. Þú nærð að anda og fyrirgefa sjálfum þér og öðrum sem er svo mikilvægt til þess að hefja nýtt líf.

Næstu mánuðir eru spennandi tími og þú munt nota stjörnuútgeislun þína til að hafa áhrif á fólk sem getur hjálpað þér að ná næsta stigi.

Í ástinni getur þú fengið hvern sem þú vilt en þú verður þá að leggja allt undir. Þú ert svo tilfinningaríkur að þú sættir þig ekki við það næstbesta og þetta getur haft áhrif.

Þú mátt ekki halda að þú hafir alltaf rétt fyrir þér. Það er nefnilega ekki sexý. Nóvember er þinn mánuður. Það er fullt tungl í tvíbura 25. nóvember og þá er akkúrat rétti tíminn til þess að óska sér. Vertu með það á hreinu hvað það er sem þú vilt og alheimurinn mun senda þér hjálp við að láta óskina þín rætast.

Þú þarft að þróa þinn persónulega stíl, þú ert þitt eigið fyrirtæki svo skapaðu það í þeirri mynd sem þú vilt hafa það! Næstu tveir mánuðir gefa þér kraft til þess og nýttu hann, elsku tvíburinn minn, og þú munt uppskera. Kannski ekki alveg eins og þú vilt eða hélst en það er svo sannarlega margt sem mun koma þér á óvart.

Mottó: HALLÓ HEIMUR HÉR KEM ÉG.

Frægir tvíburar: Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson bæjarstjóri Garðabæjar, Andri Freyr útvarpsmaður og Lýðveldið Ísland.