Cameron vill horfa til framtíðar með Íslendingum

David Cameron forsætisráðherra Bretlands segir samskipti Bretlands og Íslands geta dýpkað þrátt fyrir erfiðleika í samskiptum þjóðanna á undanförnum árum. Þær hafi ríka sameiginlega hagsmuni að vinna að. Hann styður að kannaðir verði möguleikar á lagningu sæstrengs milli landanna.

Samskipti Íslendinga og Breta hafa verið flókin og margvísleg í gegnum aldirnar en ef þorskastríðin eru frátalin hefur sennilega aldrei reynt eins mikið á samskipti þjóðanna og í Icesavedeilunni.

En nú þegar þú ert forsætisráðherra Bretlands getur þú þá skilið að Íslendingum hafi verið brugðið, reiðst og verið sárir þegar bresk stjórnvöld beittu þá hryðjuverkalögum?

„Ég vil undirstrika að allt þetta tilheyrir fortíðinni. Við ættum að láta það liðna að baki okkur og horfa til jákvæðari hliða í samskiptum okkar. Í viðskiptum, ferðamennsku og mannlegum samskiptum Við ættum einnig að horfa til þeirra sameiginlegu hagsmuna sem við höfum. Hvort sem það er í baráttunni gegn hryðjuverkum og öfgastefnum, í að tryggja að Evrópa standi sterk í afstöðu sinni gagnvart Rússlandi, eða sjá til þess að við höfum skynsama stefnu í málefnum norðurslóða. Þetta eru allt sameiginlegir hagsmunir þannig að við ættum að einbeita okkur að þessu og láta fortíðina vera að baki okkar,“ segir Cameron

Þrátt fyrir allt eru mikil samskipti milli þjóðanna. Breskir ferðamenn hafa aldrei verið fleiri og Íslendingar fylkjast til Bretlands eins og aldrei fyrr.

Er ekki dálítið undarlegt að samskipti þjóðanna skuli ekki vera dýpri?



„Ég tel að þau geti verið dýpri. Það eru augljós vandamál úr fortíðinni sem ég held að við getum núna sett að baki og byggt upp nútímaleg samskipti fyrir framtíðina. Sem byggja á viðskiptum, ferðamennsku, sameiginlegum hagsmunum og mjög góðum pólitískum tengslum. Ég hef fulla trú á að það séu allir möguleikar á traustum samskiptum til framtíðar. Þess vegna er ég mjög ánægður með að vera fyrsti forsætisráðherra Bretlands til að koma til Reykjavíkur frá því Winston Churchill kom hingað,“ segir Cameron.

Eftir 74 ár?



„Þetta hefur verið löng bið. En ég hef bara verið forsætisráðherra í fimm ár, þannig að ég held að ég hafi staðið mig ágætlega,“ segir forsætisráðherrann sposkur.

Töluverðar umræður hafa verið undanfarin ár um lagningu raforkusæstrengs milli Íslands og Bretlands.

Er það eitthvað sem breska ríkisstjórnin getur stutt?



„Ég styð að við skoðum gaumgæfilega hvort slíkur kapall getur gengið upp. Ég held að það geti verið vinningsstaða fyrir bæði löndin. Ég veit að það eru ákveðnir fyrirvarar hér á landi þar sem þið eruð svo lánsöm að eiga mikið af endurnýjanlegri orku. En rök sem ég myndi setja fram er að þessi frábæra orka sem nýtist ykkur getur einnig nýst ykkur á alþjóðavettvangi. Ég tel að þið mynduð hagnast á því rétt eins og við myndum við að tengjast ykkar mikla og græna orkuforða . Við getum hagnast sameignlega,“ segir Cameron.

Við spurðum Cameron einnig út í þá andstöðu sem er við aðild Bretlands að Evrópusambandinu og hvað hann héldi að gerðist ef Bretar yfirgæfu sambandið og hvort hann teldi einhverja möguleika á því. Svarið við því má sjá hér að neðan.