Legóönd Sigmundar Davíðs líktist meira hundi heldur en önd

Forsætisráðherrar Norðurlandanna, Eystrasaltsríkjanna og Bretlands héldu blaðamannafund í dag á ráðstefnunni Northern Future Forum. Á fundinum gerðu ráðherrarnir upp hvað fór fram á ráðstefnunni, lýstu upplifun sinni og svöruðu spurningum blaðamanna.

Í morgun sóttu ráðherrarnir málstofur sem tengjast nýsköpun og skapandi greinar. Fram kom í máli Sigmundar Davíðs Gunnlaugssonar, forsætisráðherra, að á einni málstofunni hafi gítarleikari Rolling Stones, Keith Richards, verið til umræðu.

„Við vorum að spá í hvort að hann væri agaður eða letingi og komumst að þeirri niðurstöðu að hann hafi verið gríðarlega agaður enda æfði hann í 15 tíma á dag. Svo lærðum við hvernig á að búa til önd úr sex legókubbum. Þar stóð forsætisráðherra lególandsins Danmörku sig sérstaklega vel,“ sagði Sigmundur og skaut þá David Cameron, forsætisráðherra Bretlands, inn í:

„Já, við áttum í erfiðleikum.“

Sigmundur Davíð samsinnti því:

„Já, öndin mín líktist meira hundi heldur en önd.“

Góður rómur var gerður að ráðstefnunni á meðal forsætisráðherrana sem sögðu öll erindin sem þeir sóttu í morgun hafa verið afar áhugaverð. Þeir ræddu meðal annars um menntakerfið, borgarskipulag og hvernig nýta megi internetið í opinberri þjónustu.