Ríkið fái rýmri heimild til að innheimta dómsektir

Væntanlegt er frumvarp innanríkisráðherra um fullnustu refsinga sem veitir innheimtuaðila rýmri heimildir til að kanna eignir skuldara sekta og sakarkostnaðar. Þetta kemur fram í svari ráðherra við fyrirspurn Brynhildar Pétursdóttur.

Í frumvarpinu verður lagt til að innheimtuaðili fái heimild til að kanna eignir sem varðveittar kunna að vera í bönkum, sparisjóðum og öðrum fjármálafyrirtækjum. Hingað til hefur hann haft aðgang að fasteigna-, skipa- og ökutækjaskrár. Þá verður einnig í frumvarpinu það nýmæli að hafi brotamaður átt viðskipti verulega frábrugðin almennum viðskiptavenjum á hálfu ári fyrir brotadag geti innheimtuaðili gengið að þeim sem hans eignum.

Á bilinu 25-35 prósent dómsekta hér á landi innheimtast samanborið við 90-95 prósent í Noregi. Í skýrslu Ríkisendurskoðunar frá í október 2012 kemur fram að innheimta sekta hér á landi sé ekki nógu skilvirk og erfitt sé að beita vararefsingu fésekta vegna skorts á fangarýmum.