Óttarr Proppé býður sig fram til formanns Bjartrar framtíðar

Óttarr Proppé hefur ákveðið að gefa kost á sér til embættis formanns Bjartrar framtíðar.

Óttarr hafði áður sagst tilbúinn til forystuhlutverks innan flokksins en nú hefur hann hent sér í formannslaginn af alvöru. Guðlaug Kristjánsdóttir, forseti bæjarstjórnar í Hafnarfirði, hefur þegar sagst ætla að gefa kost á sér. Óttarr sinnir um þessar mundir þingmennsku fyrir Bjarta framtíð og hefur gert síðan eftir síðustu Alþingiskosningar þegar flokkurinn fékk sex þingmenn kjörna.

Guðmundur Steingrímsson sagði af sér sem formaður flokksins fyrr í sumar eftir að Heiða Kristín Helgadóttir, fyrrum stjórnarformaður flokksins, gagnrýndi störf hans og kenndi forystu flokksins um slakt gengi hans í skoðanakönnunum. Fylgi flokksins hefur aldrei mælst jafnlágt en aðeins fjögur prósent kjósenda hafa sagst myndu styðja flokkinn í komandi Alþingiskosningum.

Óttarr birti stöðuuppfærslu á Facebook þar sem hann opinberar ákvörðun sína. Þar skrifar Óttarr: „Ég ef ákveðið að bjóða mig fram til embættis formanns Bjartrar framtíðar á ársfundinum 5. sept. Ég hef óbilandi tröllatrú á erindi okkar. Það er þörf og eftirspurn eftir frjálslyndu, grænu og mannréttindasinnuðu stjórnmálaafli. Björt framtíð leggur áherslu á pólitíska siðbót og hefur staðfasta sýn á langtímahugsun og það að almannahagsmunir standi framar sérhagsmunum. Ég vil gera mitt í þessari baráttu. Ást, virðing og rokk og ról, Óttarr.“