Uppfært: Í upprunalegu fréttinni stóð að kirkjan hefði hafnað tillögu ráðherra sex sinnum. Það er ekki rétt og er þetta í fyrsta sinn sem slíkri tillögu er hafnað.

Kirkjuþing hafnaði í dag tillögu innanríkisráðherra um afslátt af kirkjujarðasamkomulaginu. Þetta er í sjötta sinn sem ráðherra fer fram á afslátt og í fyrsta sinn sem því er hafnað. Í tilkynningu frá þjóðkirkjunni segir að kirkjujarðasamkomulagið sé samningur tveggja aðila og þar hafi þjóðkirkjan „staðið að fullu við sinn hluta samningsins.“

„Nú fer þjóðkirkjan fram á að ríkið geri slíkt hið sama og áréttar að um er að ræða efndir ríkisins á samningi en ekki fjárveitingu,“ segir í tilkynningu þjóðkirkjunnar.

Þá segir einnig að ríkið greiði laun 107 presta í stað 138 eins og kveðið sé á um í samkomulaginu.

„Kirkjuþing hefur fallist á þessa skerðingu eitt ár í senn með hliðsjón af bágri stöðu ríkissjóðs í kjölfar efnahagsáfallsins en nú eru forsendur breyttar. Þjóðkirkjan hefur mjög mikilvægu hlutverki að gegna í samfélaginu og getur ekki lengur sinnt skyldum sínum eða haldið uppi eðlilegri þjónustu með samdrætti, niðurskurði og eignasölu. Þar er komið að þolmörkum.“

Kirkjujarðasamkomulagið er frá 1997 og fól í sér að þjóðkirkjan afhenti ríkisvaldinu um 600 jarðir til eignar. Á móti fékk kirkjan árleg afgjöld sem námu launum 138 presta og nokkrum starfsmönnum kirkjunnar. Í tilkynningunni segir að meðal þeirra eigna sé land undir Garðabæ og fleiri jarðir sem hlutar bæjarfélaga standi nú á. Síðar bættust Þingvellir við.

„Alls nemur sá afsláttur sem kirkjuþing hefur veitt ríkisvaldinu um það bil 2,5 milljörðum frá árinu 2010. Í kirkjujarðasamkomulaginu er ákvæði þess efnis að vísa megi útfærslu samningsins og fjármálalegum atriðum til gerðardómsnefndar, rísi ágreiningur um þessi atriði.“